Gujarat-a chemical factory puakah mi 12 an thi

Gujarat-a Ahmedabad bula Pirana-Piplaj-ah Nilaini zing lam khan chemical factory-a godown (kudam) chu a puak a, chhiatna thleng vang hian he hmuna hnathawk mi 12 an thi a, mi pakuain hliam an tuar bawk. 

Kudam-ah hian chemical thil tam tak dah a nih thu thuneitute chuan an sawi a, thil puah hun lai vel hi Nilaini chawhma lam dar 11 vel a ni. Kudam-ah hian thil puak vang hian kangmei  a chhuak zui a ni. He thil thlen lai hian hnathawktu eng emaw zat an awm a ni.

Hnathawktu mi 12 thi zingah hmei­chhia panga an tel a, hliamte hi a rang thei ang berin Ahmedabad-a LG Hospital-ah dahluh nghal an ni. Darkar kua chhung lai chu chhanchhuah hna hi thawh a ni a, lung ina a delhte pawh lak chhuah niin, Nilaini zan dar 8:30 vel khan an zo thei hram a ni.

He thil thleng chungchangah hian chief fire officer M F Dastur chuan kangmei hi minute 30 chhungin an ṭhelh theih thu a sawi a, "Kangmei chu nasa tak a ni lo, concrete-breaker (bang tihchhiatna) hmangin bang kan verh chhia a chumi aṭang chuan kudam-a hnathawkte hi kan chhanchhuak thei a ni. Fire department lamin kan tum ber chu helai hmuna mihring thawkte chhanchhuah  a ni," tiin Dastur chuan a sawi. 

Prime minister Narendra Modi chuan he thil thleng hi pawi a tih tak zet thu a sawi a, thi chhungte a tawrhpuina thu a sawi bakah, hliam te chu a ṭawngṭaipui tur thu a sawi a, thuneitute chuan chhiat tawkte chu a theih ang anga chhawmdawlna tur an ngaihtuahsak tur thu pawh a sawi bawk a ni. 

Gujarat Chief Minister Vijay Rupani chuan state sorkarin factor-a chhiat­na thlenga thi chhungte hnenah zangna­dawmna cheng nuai li a pek tur thu a sawi. CM hian he thil thlen chhan hi hriat chian a nih loh avangin he thil thlen dan chungchang chhui turin IAS officer pahnih Vipul Mitra leh Sanjeev Kumar chu ruat an nih thu a sawi.