Shiv Sena MP-ten hlawh lak tum

Parliament Budget session thawh hnihna, March 5–April 6 chhunga neih chu member-te aubuai avangin rorel mumal thei loin a tawp a, sorkar chuan hnathawk mumal loa an awm chhung ni 23 hlawh leh allowance chu NDA MP-ten an la dawn lo tih a puan hnuah, Shiv Sena MP-te chuan harsatna thlen chhanah rorellai sorkar puhin an MP-te chuan an hlawh an la dawn tih a sawi thung.

Ningani khan NDA MP-te chuan hlawh an lak loh tur thu hi a sawi a, Congress leh eptu party dangte House-ah an aubuai ṭhin avangin ro an rel thei lo a, hna thawk loa an awm avangin an thawh loh hlawh chu an la thei lo tih an sawi a ni.

Central-a BJP thawhpuitu, Shiv Sena chuan BJP hian MP-te hlawh lak loh tur chungchangah hian an party chu biakrawn an ni lo tih a sawi. Budget session thawh hnihna rorel thei loa a awmna chhanah sorkar chu a mawhphurtu a ni tiin, thla tharah Karnataka assembly inthlan neih a nih dawn avangin BJP chuan dinhmun ṭha an chan theih nan Parliament hi rorel thei loa a awm a duh zawk a ni, a ti.

Sena MP Arvind Sawant chuan BJP chuan thutlukna a siam dawnin a thawhpui party dangte a hrechang lo a, president leh vice-president thlan dawna MP-te vote a duh chauhin a thawhpuite chu a hria niin a sawi. Sawant chuan an party MP-te chuan hna an thawk reng nia sawiin, Parliament inkhawm hi mumal lo mah se, mipuite harsatna tawhte sawipuiin minister-te pawh meeting an neihpui reng niin a sawi.

Shiv Sena hian Lok Sabha-ah MP 18 neiin, NDA hnuaia BJP tih lohah member ngah ber a ni. BJP hian member 275 a nei a ni.

BJP thawhpui dang, Rashtriya Lok Samta Party (RLSP) hotu leh Union minister Upendra Kushwaha pawhin NDA MP-te hlawh lak loh tur tih chungchang hi an hriat loh thu leh, rawn an nih loh thu a sawi bawk. Hlawh lak tur leh tur loh chungchangah an party chuan thutlukna an la siam lo niin a sawi.