Eptuten CJI banna tur motion pu lut lo

Chief Justice of India Dipak Misra ban tura phutna motion chu eptute party chuan Parliament-ah putluh tumin hun eng emaw chen an buaipui a, motion pulut tura MP signature ngai zat pawh an neih vek hnuah an pu lut leh ta lo.

Nimina kha Parliament budget session thawh hnihna tawpna a ni a, nimina Parliament in hnih inkhawm chu member-te an au buai leh avangin tihtawp a ni. Congress kaihhruai eptu party-te chuan motion thlawptu MP 50 chuang signature la vek mah se, CJI banna tur motion hi Parliament budget session rorel tawp niah an pu lut ta lo a ni. Impeachment motion pu lut tur hian Rajya Sabha-ah MP 50 thlawpna leh, Lok Sabha-ah MP 100 thlawpna tal an neih a ngai a ni.

CJI banna tur motion hi Congress, NCP leh Left Party MP-ten an buaipui a ni. Mahse eptu party lian ber, Congress party chhungah hemi chungchangah ngaihdan phir a awm a, hei hi kaltlang pui a ni loh chhan nia sawi a ni bawk. Congress MP senior ṭhenkat, Supreme Court-a senior advocate ni bawkte chuan CJI paihthlak tuma hmalakna hi an thlawp lo nia sawi a ni.