SC-in Aadhaar leh mobile phone thlunzawm chhan zawt

Supreme Court chuan sorkar laipui hnenah firfiak tlemte zawnchhuah tumna avanga ram puma mipuite an mobile phone leh Aadhaar thlunzawm tura a ti chu thil dik a ni em tih a zawt.

Chief Justice Dipak Misra kaihhruai judge panga awmna constitution bench chuan, " Firfiakte hian SIM card hi an dil ve ngei em? Firfiak tlemte man tum vanga ram mipui vaibelchhe 120-te an mobile phone leh Aadhaar thlunzawm tir tum hian harsatna a thlen a ni", tiin sorkar laipui hnenah zawhna a siam.

Bench chuan sorkar laipui chuan a hmalakna hi ram tana ṭha tura ngaihtuaha danin a phal anga kalpui a ni tiin chhuanlam a nei maithei a, mahse mi vaibelchhe 120-te harsatna a thlen phah chu thil dik tak a ni dawn em ni tiin a zawt. Ram tana tha tur nia ngaiha kalpui nghal ringawt chu thil tih chi ber a ni tihna a ni kher lo tih a sawi bawk.

Sorkar laipuiin mobile phone leh Aadhaar thlunzawm vek tura hriattirna a tichhuah chungchangah Supreme Court-ah hian petition eng emaw zat thehluh a ni. Heng petition-te a ngaihtuahnaah, court chuan sorkar laipui ngaihdan chu a pawmpui loh thu sawiin, Aadhaar hian bank-a inbumna leh dik lo taka thiltihna thleng ṭhinte a tihtawp phah dawn lo niin a sawi. Court chuan, 'Thil dik lo titute nihna chu hai theih a ni lo. Bank chuan tu hnenah nge loan a pek tih pawh a hrechiang a, thil dik lo thlengah hian tisualtute chu bank official-te nen an inthurual ṭhin a ni. Hetiang thil thleng hi Aadhaar hian a titawp thei dawn lo", a ti.