Kejriwal-a'n debate neih puiah Amit Shah sawm

Delhi chief minister Arvind Kejriwal chuan union home minister Amit Shah chu Delhi assembly inthlan neih hma ngeia mipui hmaa debate neihpuiah a sawm. 

Delhi assembly inthlan neih turah Aam Aadmi Party (AAP) hruaitu Kejriwal chuan BJP chu chief ministerial candidate puang turin a lo cho tawh bawk a, nimin chawhnu dar khat thleng  khan hun a pe. BJP CM candidate chu debate a neihpui tur thu Kejriwal chuan a sawi a, mahse a  hun pek chhunga BJP in CM candidate an puan theih loh vangin, debate neihpuiah Amit Shah zawk hi a sawm zui nghal a ni. 

"Debate neih hi ṭhil ṭha tak a ni. Amit Shah chuan min vote ula, chief minister ṭha kan pe ang che u, tiin a sawi a. Delhi chuan BJP an vote-na chhan tur hi an hrechiang duh a ni," tiin Kejriwal chuan a sawi. BJP chu CM candidate tura an hualte hming tal sawi turin a cho zui bawk. 

BJP in chief minister can­didate a puang ngam lo chu Delhi mipuite hnen aṭanga blank cheque phut ang a ni tiin, hei hi thil pawm theih a ni lo tih a sawi. Hetih lai hian BJP chuan inthlan neihna tam zawkah prime minister Narendra Modi chu hmathehah hmangin, candidate te aiin PM hming leh centre-a BJP hlawhtlinna neihte chu vote zawn nan a hmang ṭhin zawk fo a ni. Hei hi Kejriwal leh AAP te chuan an bei zui a, Delhi-a BJP-in CM candidate a tarlang thei lo chu an bei zui a ni.