West Bengal-in raltlante land right document pe

West Bengal chief minister Mamata Banerjee kaihhruai Trinamool Congress sorkar chuan raltlan chhungkaw 25,000-te hnenah India khua leh tui nih theihna, land right document a pe.

Mamata chuan raltlan chhungkaw 25,000-te hnenah land right document chu pek an nih thu a sawi a, a hmaa a lo pek tawhte nen West Bengal sorkar hian an state-a raltlan nuai 1.25-te hnenah ram mi nih theihna a pe tawh a ni. He land right document hi India khua leh tui nihna anga pawm tlak a nih thu Mamata chuan sawiin, "Tuman India khua leh tui nihna hi an hlihsak lo ang," a ti.

Matua Development Board tan grant-in cheng vaibelchhe 10 pek a ni a, Namashudra Development Board tan grant bawkin cheng vbc 5 pek a ni bawk. Matua leh Namashudra mite tih hmasawn an nih theihna tura he ṭanpuina (grant)-te hi pek an nih thu Mamata chuan a sawi. Heng mite bakah hian Bagdi, Mahji leh Dule mite tan Mamata chuan ṭanpuina pek leh an nih tur thu pawh a sawi bawk.

CM-in raltlante hnena land right document a pek hi nakkuma an state-a assembly inthlan tur thlir lawka ti niin sawiseltu lam chuan an puh thung. Union home minister Amit Shah pawh West Bengal inthlan tur chungchang avangin nimin khan ni hnih cham turin a zin a ni.