Punjab Chief Minister Capt Singh a bang ; CM thlaktu ngaihtuah tura CLP meeting neih tum ṭhulh

Punjab chief minister, Congress party hruaitu hlun captain Amarinder Singh chu hun rei tak Punjab Pradesh Congress Committee (PPCC) chief Navjot Singh Sindhu nen an inkar boruak a ṭhat loh hnuah, Inrinni liam ta khan Chief Minister a nihna aṭangin a bang.

Chief Minister thlaktu tur ngaihtuaha nimina Congress Legislative Party (CLP) meeting neih tum chu ṭhulh a ni a, central lama party hotuten CM thar tur hi an puang zawk dawn nia sawi a ni.

Punjab hi nakkuma assembly inthlan nei tur a ni a, hetih lai hian rorellai Congress party chhungah buaina hi a awm ta a ni.

Kum 79 mi, captain Amarinder Singh banna hi governor Banwarilal Purohit chuan a pawmsak a, mahse amah thlaktu tur ruat fel a nih hma chuan CM dinhmun hi lo chelh chhunzawm rih turin a ngen. Singh hi kum 24 chhunga Punjab chief minister ni tawh zinga term hmang zo loa banna thehluh awmchhun a ni.

Singh hian Inrinnia Congress Legislative Party (CLP) meeting neih hma lawkin banna hi a thehlut a, banna a thehluh hnua chanchinbu mite a kawmnaah a chunga Congress high command chet dan chu a zahthlak a tih thu sawiin, CLP meeting neih tur pawh hriattir a nih ve loh thu a sawi. Politics chawlhsan a tum loh thu leh, Congress chhuahsanin party dang a zawm dawn tih chungchang pawh a la ngaihtuah tur thu a sawi nghal bawk.

CM thar ruat tur chungchangah hian party MLA-te chu an inlungrual thei lo a, hei vang hian CM bakah deputy chief minister pawh ruat tel nghal tum nia sawi a ni bawk. Hruaitu thar ruat tur chungchang buaipui tur hian AICC general secretary leh Punjab affairs in-charge Harish Rawat leh party central observer, Ajay Maken leh Harish Chaudhary-te chu Chandigarh-ah an awm mek.