Dengue hri laka fimkhur turin sorkar laipuiin state 11-te hriattir

Sorkar laipui chuan dengue hri hlauhawm zawk hmuhna state 11-te chu fimkhur turin a chah a, hri kai chak zawka chhuichhuak a, hri kai ten an biakpawh theihna tur helpline leh testing kit, larvicides leh hri ka te enkawlna tur damdawi ṭhahnem tak khawlkhawm turin a ngen.

Dengue Serotype - II hmuhchhuahna state te chu - Andhra Pradesh, Gujarat, Karnataka, Kerala, Madhya Pradesh, Uttar Pradesh, Maharashtra, Odisha, Rajasthan, Tamil Nadu leh Telangana te an ni.

High-level review meeting-ah hri kai hmuhchhuahna state-ahte rapid response team din a, Serotype-II Dengue chungchang chhuichiang tura tih an ni a, natna inthlakdanglam te hi a hma aiin kai a awlsam mai bakah taksa lamah harsatna lian zawk a thlen niin Ministry of Health and Family Welfare chuan a sawi. State-te chu helpline, vector control, source reduction leh dengue lanchhuah dan te puang zar tam turin a ngen. Health ministry chuan heng state te hnenah hian August leh September 10 khan inralring tura thupek a lo tichhuak tawh a ni.

Covid-19 hri leng mek chungchangah pawh state 15, postivity rate sannate chu fimkhur tur leh chak zawka hma la turin health secretary Rajesh Bhushan chuan a hrilh bawk. State 15-a district 70-te chuan positivity rate 5% chunglam an nei a, district 34 te chuan positivity rate 10% chunglam an neih avangin fimkhur a ngai hle tih Health Secretary chuan a sawi.

Hunpui lo thleng turah state-te chu mipui punkhawmna buatsaih lo turin lo inveng fimkhur lawk vek turin a chah bawk a ni. State health administrator hrang hrangte pawh health infrastructure thuam chak tur leh, hri kai pun thar leh palh thulhah damdawite leh mamawh dangte pawh chhek khawl turin a chah bawk a ni. Mall, bazar leh sakhaw hmunahte kaihhruaina dan hman mek chu khauh taka kenkawh a ṭul thu sawiin, state sorkarte an state chhung district tina hri kai dante chu nitin uluk taka zirchiang turin a ti bawk.