Ni 11 chhungin Covid vaccine dose vbc 10 semchhuak

India ramah Inrinni liam ta khan Covid-19 vaccine dose nuai 77.25 semchhuah niin, ramchhunga vaccine semchhuah chuan dose vaibelchhe 80 a pel tawh tih health ministry chuan a sawi. Ni 11 chhungin vaccine dose vaibelchhe 10 semchhuah hman a ni tih a tarlang.

"India rama Covid-19 vaccine semchhuah chuan dose vbc 80 pelin mellung pawimawh tak kan siam leh ta a ni, " tiin Ministry thuchhuah chuan a sawi. Union health minister Mansukh Mandaviya chuan ramchhung mipuite leh healthcare worker-te hnenah lawmpuina a hlan bawk.

Ministry data in Inrinni zan dar 7 thlenga provisional report-a tarlan danin, vaccine dose khatna 60,03,94,452 leh dose hnihna 20,29,80,695 semchhuah leh a ni.

Vaccine semchhuah hi ramchhung mipui natna benvawn nei te leh kum upa lam te nunna venhimna tur hmanraw pawimawh tak a nih thu sawiin, ramchhungah Covid-19 hri leng dinhmunte enfiah reng a nih thu ministry chuan a sawi.

Prime minister Narendra Modi piancham vawi 71-na pualin India-ramah Zirtawpni khan vaccine dose vaibelchhe 2.5 chuang semchhuah niin khawvel huapin record siam a ni bawk. Health Minister chuan hei hi khawvel huap pawha hlawhtlinna ropui tak anih thu a sawi.

Report ṭhenkhat tarlan danin, hemi hmaa nikhata vaccine semchhuah hnem ber chu kumin June thlaa China-in dose vaibelchhe 2.47-a semchhuah kha a ni.