Bharat Bandh hnuah BJP-ten Dalit-te an bei chhunzawm: Mayawati

Bahujan Samaj Party (BSP) hotu Mayawati-i chuan Dalit hnamten April 2-ah Supreme Court-in SC-ST prevention of atrocities act tihdal a tumna duh lohna lantir a, Bharat Bandh hlawhtling taka an huaihawt hnuah BJP chuan ramchhung hmun hrang hrangah Dalit-te an bei chhunzawm niin a sawi.

Mayawati-i Dalit-ten bandh hlawhtling tak an buatsaih chuan BJP chu a tihlauthawng a, hei vang hian BJP sorkarna state-a thuneitute chuan Dalit hruaitu leh an chhungte tam tak an man a ni, a ti. BSP hruaitu chuan BJP-a Dalit MP-te pawh bei zuiin, Dalit hnam chuan an ngaidam thei ngai dawn lo a ni, a ti.

Centre-a Narendra Modi-a kaihhruai sorkar chu bei zuiin, Mayawati-i chuan BJP kaihhruai sorkar hnuaiah chuan Dalit-te chuan an lungawi lohna pawh an lantir thei lo niin a sawi. Dalit-te chuan nawrh an huaihawt avangin beih let an tawk a, beih an tawhna finfiahna vide footage pawh a awm a ni, a ti.

BJP sorkarna state hrang hrangah pawh Dalit-te chuan beih an tawh thu sawiin, Uttar Pradesh chief minister Mayawati-i chuan, "Uttar Pradesh leh Madhya Pradesh-a BSP-in thuneihna a chan hunah chuan dik lo taka Dalit beih an nih ṭhin hi kan titawp vek dawn a ni. Dalit laka thubuai ziaktu officer-te chu suspend vek an ni ang" tiin a sawi.

Supreme Court-in SC/ST-te chunga hleilenna thleng ṭhin venna, SC-ST prevention of atrocities act a siamṭhat chungchangah, BSP hotu chuan BJP leh NDA sorkar chu he dan tihdalnaa mawhphurtuah a puh. "BJP chuan Dalit-te auchhuah hi a hlau a, an thuneihna chhuhsak mai theih an ni tih an hriat a ni", a ti.

Dalit chunga hlei a len chhunzawm zel chuan BJP chuan a nghawng a la tuar dawn a ni tiin, Mayawati chuan kum 1975-a Indira Gandhi kaihhruai sorkarin emergency a puan avanga Congress party chunga thleng ang khan an la tawk ve dawn niin a sawi. Tun hnaia ramchhung Dalit hruaitu hlui, Dr BR Ambedkar lim suasam a ni ṭhin pawh a dem thu a sawi bawk.

Uttar Pradesh-a BJP MP Yashwant Singh pawhin Prime Minister Narendra Modi-a hnenah lehkha thawnin, central-a BJP in sorkarna a chelh aṭangin kum li chhungin Dalit tan engmah a la ti lo niin a sawi.

Dalit MP Singh chuan Dalit hnam, mi maktaduai 300 chuangte hamṭhatna turin sorkar laipui chuan hna pakhat pawh a la thawk lo niin a sawi a, amah ang bawka Dalit MP dangte pawh enhran tawkin, an theihnate hmang ṭangkai sak an ni lo niin a sawi.