Chief Justice of India paihthlak hi judiciary buaina chinfelna a ni lo : Justice Chelameswar

Kumin January 12-a Chief Justice of India Dipak Misra-a rorel dana lungawi loh thu sawia press conference neitu, Supreme Court judge senior pali zinga mi Justice Jasti Chelameswar chuan CJI paihthlak chu buaina chinfelna a ni lo tih a sawi a, judiciary system chu siamṭhat a ngai a ni, a ti.

Eptute chuan Parliament budget session neih zawh takah khan CJI Misra-a paihthlakna tur motion hi putluh tumin, motion putluhna tura MP signature ngai zat pawh a la vek hman a ni. Mahse session tawp ni thlengin motion hi putluh a ni ta lo a, hei hi eptu party lian ber Congress party hruaitute ngaihdan in an loh vang niin an sawi.

Supreme Court-a CJI dawta judge senior ber Justice Chelamesar chuan Misra ban chu buaina chinfelna tur a ni lo a, judiciary system siamṭhat dan ngaihtuaha sawihona hun buatsaih a ngai zawk a ni, a ti. January 12-a budget senior dangte nena press conference an neih chhan chu CJI hnathawh leh hna sem danah an lungawi loh vang leh, ramchhunga court sang ber dinhmun chu an vei vang a ni tih an sawi. Kumin June 22-a pension-a a chhuah hnuah, sorkar hnuaia hna dang thawh chhunzawm a tum loh thu a sawi bawk.