Indian Army tan bullet-proof jacket nuai 1.86 lei dawn

Indian army tana bullet-proof jacket (BPJ) nuai 1.86 lei tur chu tihfel a ni dawn ta a, Thawhṭanni khan Defence Ministry chuan a leina tura cheng vaibelchhe 640 contract chu a ziakfel ta.

Defence Ministry chuan thuchhuah siamin, enchhin a nih hnuah contract hi ziakfel a ni ta tih a sawi. He contract hi Make in India policy hnuaiah kalpuiin, ramchhunga defence manufacturer SMPP Pvt Ltd chu bullet-proof jacket supply tur hian contract hi ziakpui a ni ta a ni. Army-ten bullet-proof jacket an hman mek hi a ritin, invenna atan a ṭha tawk lo nia sawi a ni.

Army chuan jacket thar hi sipaite tan khawi hmunah pawh hman nuam leh awlsam, venhimna ṭha zawk pe tur a nih thu an sawi. Jacket thar hian inbeihnaah pawh 360 degree protection a pe thei dawn a, steel core bullet lak aṭang pawhin a hum thei dawn a ni.

Thuchhuah an siamah, Army chuan bullet-proof jacket 1,86,138 leina tur contract lian tham chu tihfel a ni ta tih sawiin, sipaiten an mamawh tak BPJ chu an nei thei dawn tih a sawi.