Chaw ngheia nawrh huaihawt YSRC MP damdawi-inah dah

Andhra Pradesh tana special caterogy status pek phutin rorellai Telegu Desam Party (TDP) leh YSR Congress (YSRC) MP-te chuan nawrh an huaihawt chhunzawm zel a, Thawhṭanni khan chaw ngeia nawrh huaihawt YSRC MP YV Subba Reddy chu a chauh vanga medical checkup neihpui a nih hnuah RML Hospital-ah dah a ni.

TDP MP-te chuan an state tana special caterogy status pekna tur, AP Reorganisation Act chu hman phutin Budget session neih zawh takah khan session chhungin Parliament chhung leh pawn lamah te lungawi lohna an lo lantir tawh a, Parliament session a tawp hnuah pawh Delhi-ah lungawi lohna hi an lantir chhunzawm zel a ni. Mahse Thawhṭanni khan AP Chief Minister leh TDP hotu Chandrababu Naidu chuan MP-te hi a ko haw a, MP-te chu an bial chhungah hma lak zel dan tur ngaihtuaha district level-a party leh an thawhpuite meeting neihpui turin a ti a ni.

Special category status pek phut hian AP-a eptu pawl, YSRC pawhin chaw ngheia nawrh an huaihawt. Kar kalta Zirtawpni, Budget session tawp ni khan YSRC MP panga-te chuan special status pek an nih loh vanga lungawi loin Lok Sabha Speaker Sumitra Mahajan-i hnenah banna lehkha an lo thehlut tawh bawk a ni. Hemi hnu hian heng MP-te hian Andhra Bhavan-ah chaw ngheiin nawrh an huaihawt chhunzawm nghal bawk.

YSRC MP-ten Delhi-a chaw nghei nawrh an huaihawt hi an bial chhunga party hruaitute chuan an lo zawm ve bawk a ni. YSRC chuan BJP leh TDP chuan kum li chhung Andhra Pradesh mipuite an bum niin a sawi a, Andhra Pradesh ṭhendarh a nih dawna mipuite hnena an thutiam tam zawk chu hlen chhuah loin a la awm a ni, a ti.