Muslim vote kan duh lo : Rajasthan BJP MLA

Rajasthan Bharatiya Janata Party (BJP) MLA BL Singhal-an Muslim-te vote a duh loh thu leh, vote tura a sawm ngaih loh thu a sawi chuan sawizui a hlawh hle.

Rajasthan-a Alwar bial BJP MLA hian news agency ANI in a kawmnaah Muslim-te vote tura sawm chu an pawikhawihna thlente ngaihthah sakna angah a ngaih thu sawiin, vote tura a sawm ngai loh thu a sawi. Muslim-a Meo sect-te chuan BJP pawh an vote ngai lo tih sawiin, an lak aṭang hian a inlahrang zawk niin a sawi a ni.

MLA Singhal hian a hma pawhin Muslim chungchanga inhnialna chawkchhuak thei tur thu a lo chhakchhuak tawh bawk. Kumin January thla khan eng ramah pawh Muslim mipui 30% awm tlinnaah chuan an ram rorelna thunun an tum tlat zel a ni, tiin a lo sawi tawh bawk.

Singhal chuan, "Kan ramah chuan Hindu-te chuan fa pakhat emaw pahnih emaw chauh neiin, an fate chu IAS leh IPS officer nih tir tum dan an buaipui a ni. Hetih lai hian Muslim-te chuan tam taka inthlah pun a, ram thuneihna lak tumin an bei a, zirna leh hmasawnna tih vel chuan an tan awmzia a nei lo. Hei hi ka mimal ngaihdan a ni", tiin a sawi. A bial chhunga Muslim-te chu Hindu-te anga an sum neihte an nuphung tihchangkangna tura hmang loin, silai leh a mute leiin an chhekkhawl zawk niin a sawi.