Punjab Chief Minister thar atan Charanjit Channi lalut

Punjab chief minister aṭanga Captain Amarinder Singh a ban hnua a thlaktu atana ruat, Charanjit Channi chu nimin khan Congress sorkar chief minister thar turin rinawmna thu tiamtira lakluh nghal a ni.

Punjab govenor Banwarilal Purohit chuan CM thar hi rinawmna thu tiamtirin a lalut a,a rual hian a deputy atan ruat mi pahnih - Sukhjinder Singh Randhawa leh Om Prakash Soni-te pawh lakluh nghal an ni bawk.

CM thar Congress party hruaitu, Rahul Gandhi pawhin a telpui a, state unit Congress president Navjot Singh Sindhu leh official dangte pawh an tel. CM hlui Amarinder Singh erawh a tel lo a, mahse Channi hi duhsakna erawh a hlan a ni.

Punjab-ah hian state Congress party chief Navjot Singh Sidhu leh CM bang ta, Amarinder Singh-te inkar boruak hi a ṭha lo hle a, hun eng emaw chen harsatna an neih hnuah thla li hnu lawka assembly inthlan an hmachhawn mai tur chungin Singh hi CM a nihna aṭangin kar liam ta kartawp khan a bang thut a ni. CM thlaktu tur pawh hi ruat fel a ni nghal mai lo a, party-in an ruat hmasak Ambika Soni chuan Sikh ni lo CM-a dah chu a fuh dawn lo nia sawiin a lo hnar a, candidate dangte an enkual hnuah Channi hi an thlang ta a ni.

Kum 58 mi Channi hi MLA term thumna hmang mek niin, Amarinder Singh hnuaiah minister a ni a, Sidhu nen pawh inpawh ṭha tak nia sawi a ni. Channi hi Dalit niin Dalit Sikh zingah CM ni thei hmasa ber a ni bawk. CM atana Dalit an dah hi inthlana Dalit hnam vote lak an tumna niin BJP chuan a puh zui nghal. Punjab mipui zinga 31% hi Dalit an ni.

CM hlui, Amarinder Singh chuan a awm dan tur a la puang duh lo a, Congress party-ah a awm zui dawn em tih zawhna pawh a la sawichiang duh lo a ni. Hetih lai hian report ṭhenkhat chuan Shimla-a cham mek, party hruaitu Sonia Gandhi chuan Singh hi a hmu dawn niin an sawi.