Kum 2020-ah Road Accident vangin mi nuai 1.20 an thi ; Chawhrualin nikhatah mi 328 thi ziah ang a ni

India ramah kum 2020 chhung khan Covid-19 vanga inkharkhip kalpui karah kawngpuia chetsualna, "deaths due to negligence relating to road accidents" vangin mi nuai 1.20 an thi a, nitin chawhruala thi zat chu 328 an nih thu sorkar data chuan a tarlang.

Kum thum chhung khan kawngpuia lirthei tlan dan ngaihpawimawh loh vangin mi nuai 3.92 velin nunna an chan tih National Crime Records Bureau (NCRB) chuan kumtina an tihchhuah ṭhin 'Crime India' report for 2020-ah an tarlang.

Kum 2020 chhung khan road accident vanga thi nuai 1.20 chhinchhiah a ni a, kum 2019 khan nuai 1.36 leh kum 2019 khan nuai 1.35 an awm bawk.

Kum 2018 aṭang khan ramchhungah mi sut zawh a tlanchhe zui "hit and run" case nuai 1.35 ziahluh a nih thu NCRB report chuan a tarlang. Kum 2020 chhung bik khan 'hit and run' case 41,196 ziahluh niin, 2019-ah 47,504 leh 2018 khan 47,028 case ziahluh a awm a ni.

Ramchhungah chawhrualin nitin hit and run case 112 awm ziah ang a ni tih data chuan a sawi.

Mi sut hliam emaw vantlang hmuna pawlawh taka khalh emaw vangin case nuai 1.30 ziah luh a ni a, 2019-ah nuai 1.60, 2018-ah nuai 1.66 an awm a, na taka insut hliamna, grievous hurt case chu 2020-ah 85,920, 2019-ah nuai 1.12 leh 2018-ah nuai 1.08 an awm tih data chuan a tarlang bawk.

Nikum khan inthlahdah avanga rel accident thlenna case 52 a awm a, 2019 khan 55 leh 2018 khan 35 an awm tih report chuan a sawi.

Damdawi lama thawktute inthlahdah avanga thihna thlenna, "deaths due to medical negligence" case 133 ziahluh a ni a, 2019-ah 201 leh 2018-ah 218 a awm.

Kum 2020 khan ramchhungah inthlahdah vang hrim hrima thihna thleng,"Deaths due to other negligence" case 6,367 awmin, 2019-a 7,912 leh 2018-a 8,687 a awm bawk.

NCRB chuan March 25, 2020 aṭanga May 31, 2020 chhung khan Covid-19 hripui leng vangin ramchhungah inkharkhip kalpui ani a, vantlang puipunna hmunah leh kawngpui lamah mihring chet tlatna chu a tlem thu an report-ah hian an tarlang.