Kar khat chhungin Covid-19 kai 15% in tlahniam ; Thla ruk hnua a hniam ber ṭum a thleng

India ramah kar liam ta khan Covid-19 hri kai thar 15% in an tlahniam a, thla ruk hnua kar khata hri kai hmuhchhuah tlem ber ṭum niin, Kerala-ah hri kai hi 21% vel zetin an tlahniam bawk a ni.

Ramchhungah kar liam ta (September 13-19) inkar khan Covid kai thar nuai 2.14 an awm belh leh a, a kar hmasa leh zawkah khan nuai 2.51 hmuhchhuah a ni. March 8-14 inkar hnua hri kai an tlem ber ṭum a ni a, kar 27 hnuah an tlahniam leh a ni.

Hri kai an tlakhniam chhan lian ber chu hri kai hmuhchhuah tam ṭhinna Kerala-ah an tlakhniam vang niin, ramchhunga hri kai zat aṭanga 62% an la tling pha tho a ni. Kar liamta chhung khan Kerala chuan hri kai thar nuai 1.33 an nei leh a, a kar hmasa zawka hri kai nuai 1.67 aiin 20.6% in a tlahniam zawk a ni. Kar hnih liam ta,an state in peak an thlen chhoh lai khan Kerala chuan hri kai nuai hnih chuang an nei hman a ni.

Maharashtra-ah hri kai an tlahniam zel a, hetihlai hian Mizoram leh Tamil Nadu-ahte chuan hri kai hi an pung thung. Ram pumah kar liam ta chhung vek khan hri vanga thi 2,315 an awm a,a kar hmasa zawka thi 2,104 aiin 10% in an tam zawk.

Hetih lai hian Pathianni khan India-ah Covid-19 kai thar 30,814 an awm belh leh a, Kerala state bikin hri kai 19,653 an nei. Hemi hma ni khan Kerala chuan hri kai thar 19,352 an awm bawk. Pathianni vek khan hri vanga thi 295 an awm a, Kerala-ah 152, Maharashtra 49, Tamil Nadu 27, Karnataka 16 leh Bengal-ah thi 11 an awm a ni.