CBI-in Unnao pawngsual thubuai chhui dawn ; BJP MLA lakah FIR ziak lut

Central Bureau of Investigation (CBI) chuan Uttar Pradesh-a Unnao khuaa pawngsualna thleng leh thihna thleng chungchang a chhui dawn a, he pawikhawihna thlenga mawhphurtua puh Bharatiya Janata Party (BJP) MLA Kuldeep Singh Sengar-a lakah FIR ziah luh nghal a ni bawk.

Unnao khuaa hmeichhe tleirawl, kum 16 mi chuan nikum June thla khan MLA Sengar leh a thurualpui ten an pawngsual niin a sawi. Hmeichhe chhungte hian Sengar lakah hian FIR thehluh an tum fo a, mahse police-ten an lo dang zel a ni. Pathianni khan an chhungkua hian an laka thil thleng duh lohna lantir nan Lucknow-a UP Chief Minister Yogi Adityanath-a chenna in kawtah intihlum an tum a, mahse an dang a ni. Pawngsualtu tawktu pa hi man niin police kuta a awm laiin kut thlak a ni a, Thawh-

ṭanni khan damdawi-inah a thi a ni. A chhungte chuan Sengar-a mi leh sate thah niin an puh.

He pawikhawihna thlenga mawhphurtu bera puh hi BJP MLA a nih avangin Congress party chuan BJP sorkar beihna atan a hmang zui a, Congress president Rahul Gandhi chuan hmeichhe tleirawl pawngsual leh a pa police kuta awm laia kutthlak a ni hi thil zahthlak tak a nih thu sawiin, he thil thleng duh lohna lantir hian Prime Minister Narendra Modi chuan chaw a nghei ve dawn em tihte a zawt a ni.

Uttar Pradesh sorkar chuan Nilaini zan khan he pawngsualna thleng chungchang hi CBI kuta hlan a remti a, nimin zing khan Unnao-a Makhi Police Station-ah Indian Penal Code leh POCSO hnuaiah MLA Senger hi thubuai siamsak a ni zui a ni.

MLA Senger hi police kuta inpe tura hriattir a ni a, mahse an puhna hi thu dik lo nia sawiin a inpe duh lo a ni. Nilaini zan khan Lucknow-a Senior Superintendent of Police office pawh a tlawh a, mahse darkar chanve hnuah a kalchhuak leh nghal a ni.