UAE-ah India mi pathum kum 517 tang turin hrem

Dubai court chuan India mi pathum–mipa pahnih leh hmeichhe pakhat chu mi tam tak bum a, an sum ṭhahnem tham tak laksaka puhna thubuaiah thiam loh chantirin, kum 517 ṭheuh ṭang turin a hrem.

Dubai Misdemeanours Court-in thiam loh a chantirte hi Sydney Lemos leh a nupui Valany bakah Ryan D'Souza te an ni a, an lakah hian thubuai 515 zet ziahluh a ni. Sydney Lemons hi Goa lam mi niin Dubai Media City-a forex trading company, Exentia-a chief executive a ni. Exential hian an company-a pawisa dahtute chu a pung 120% pek a tiam a, hei vang hian mi tam takin sum dahin an sum dah hi US dollar matkaduai 200 zet a tling a ni. Mahse company chuan investor-te hi a tirah sum tlem tlem an pe a, a hnuah chuan an pechhuak chhunzawm tawh lo a ni. Investigator-ten an chhui hnuah Exential neitu Lemos hian investor-te sum dahkhawm hi Australia-a a nupui firm, FC Prime hnenah a thawn ṭhin tih hriatchhuah a ni.

Kum 2016 July thla khan Dubai-a Department of Economic Development chuan Exential office hi a lo kharsak tawh a ni. Exential bumna avang hian UAE-a cheng mi 7,000 dawn chuan an sum khawlsa an chan phah a ni.