Parliament Question Hour-a CAA, NPR leh NRC zawhna a tam
Parliament budget session neih mekah nimin khan Question Hour hmasa ber hman niin, Citizenship Amendment Act (CAA), National Population Register (NPR) leh National Register of Citizens (NRC) leh heng thil kaihhnawiha nawrh huaihawt mek chungchanga zawhna lut a tam hle.
Ministry of Home Affairs (MHA) chuan zawhna te hi chhangin, India ram puma NRC kalpui tum nia sawi chungchangah sorkar chuan eng thutlukna mah a la siam lo tih a sawi. NPR kalpuina tura information pek dan pawh mipuiten an duhdan ang a ni tih a sawi bawk Minister of state for home Nityanand Rai chuan NPR atan hian document leh India khua leh tui nihna finfiahna dangte phut kher a ni dawn lo tih a sawi a ni.
MHA chuan National Register of Citizens duh lotu state-te pawh inbiakna an neihpui mek tih a sawi bawk. Hemi rual hian NRC chungchanga zawhna eng emaw zat awm chu chhangin, kalpui a nih dawn leh dawn loh chungchangah sorkarin thutlukna a la siam lo a ni, a ti.
Nimina Lok Sabha inkhawmah hian Congress party chuan sorkar laipuiin nikum August 5-a Jammu and Kashmir special status pekna, Article 370 a tihtawp aṭanga pawn chhuak thei loa J&K political leader a hren, Farooq Abdullah leh hruaitu dangte chu chhuah phutin House aṭangin an chhuak a ni.