Biden leh Modi-te September 24-ah inhmu dawn

Prime minister Narendra Modi leh US president Joe Biden-te chu September 24 khian White House-ah an inkawm dawn. Hei hi ram hruaitu pahnihte hmaichhana a inkawmna hmasa ber tur a ni.

US vice president Kamala Harris pawhin naktuk hian PM Modi hi a hmu dawn bawk a ni. US senior oficial chuan ram pahnih hruaitute meeting neih turah hian India leh US

inṭhian ṭhatna chu tingheh lehzual an tum dawn tih a sawi. "Biden-Harris rorelna hnuaiah India nen Indo-Pacific chungchanga thawhdunna zau zawk leh langtlang taka kalpui dan tur sawi a ni dawn a, Covid-19 hripui leng tihtawp dan tur leh khawvel lum chak lutuk tihziaawm dan tur te sawi a ni bawk ang, " tiin official chuan a sawi.

Ram hruaitute hian ram pahnih mipuite inzawmna ṭha tak lo neih tawh tihngheh zel dan te, democracy hlutna chungchang leh US leh India-in kum 70 chuang inzawmna danglam tak an lo siam tawhte chu an sawidun tur zingah hian a tel a ni.

January thlaa US President atana Biden lakluh a nih hnuah ram pahnih hruaitute hi virtual hmang chuan ṭum eng emaw zat an lo inbe tawh a, telephone hmanga an inbiak hnuhnun ber chu April 26 kha a ni.

Vice President Harris leh PM Modi-te chu telephone hmangin June 3 khan inbiakna an lo nei tawh bawk.

PM Modi-a'n US a tlawh hnuhnun ber chu kum 2019, September kha niin, khatih hunlaia US president chu Donald Trump a ni a, Texas khawpuiah Howdy-Modi hun ropui tak an hmang a ni.

PM Modi hi thla ruk hnua ram pawn lama a zinchhuah lehna hmasa ber tur niin, Covid-19 hripui len hnua a zinchhuah vawi hnihna tur a ni bawk. March thla khan PM Modi chu Bangladesh-ah Bangabandhu Sheikh Mujibur Rahman kum za tlin champha leh Bangladesh War of Liberation kum 50-na a hmanpui a ni.