High Court 13-in Chief Justice thar nei dawn

Chief justice of India NR Ramana kaihhruai Supreme Court collegium chuan sorkar laipuiah High Court 13-a chief justice atana an rawtte hming a thehlut.

Rawtna an thehluhah hian chief justice atan hlankai tura rawt judge pariatte hming bakah high court pangaa chief justice ni mekte sawn an rawt a ni.

High court chief justice tana hlankai tura an rawtte chu Calcutta High Court acting CJ, Justice Rajesh Bindal bakah justices - Ranjit V More, Satish Chandra Sharma, Prakash Srivastava, R V Malimath, Ritu Raj Awasthi, Aravind Kumar leh Prashant Kumar Mishra-te an ni.

Tripura High Court CJ AA Kurshi chu Rajasthan High Court CJ-ah dah rawt a ni a, Rajasthan High Court CJ justice Andrajit Mahantu chu Tripura High Court CJ-ah, Mahdyra Pradesh High Court CJ Mohammad Rafiq chu Himachal Pradesh High Court CJ-ah, Meghalaya High Court CJ Biswanath Somadder chu Sikkim High Court CJ-ah, Andhra Pradesh High Court CJ AK Goswami chu Chhattisgarh High Court CJ-ah sawn an rawt bawk.

September 16-a collegium meeting chuan high court 17-a judge - Jaswant Singh, Sabina, T S Sivagnanam, Sanjaya Kumar Mishra, M M Shrivastava, Soumen Sen, Ahsanuddin Amanullah, Ujjal Bhuyan, Paresh R Upadhyay, M S S Ramachandra Rao, Arindam Sinha, A M Badar, Yashwant Varma, Vivek Agarwal, Chandra Dhari Singh, Anoop Chitkara leh Ravi Nath Tilhari-te chu sawn a rawt bawk a ni.

Chief Justice of India Ramana hian kumin April thlaa charge a lak aṭanga judiciary hnuaia hna ruak hnawhkhatna kawngah hma a la chak hle a, high court hrang hranga thawk tur mi 100 dawn hming a recommend tawh bakah, Supreme Court-a judge hna ruak pakua pawh a hnawhkhah tir tawh bawk.

India ramah hian high court 25 awmin, heng court-a judge awm thei zat hi 1,080 a ni a, mahse kumin May 1-ah khan high court hrang hrangah judge awm mek hi 420 chauh an ni.