India ramah Covid hri kai thar tlahniam zel ; Thla ruk hnua hri kai mek tlem ber ṭum thleng leh

India ramah Covid-19 hri kai thar chuan tlakhniam lam pan zelin, Thawhṭanni khan hri kai thar 26,115 an awm tih Union ministry of health and family welfare (MoHFW) chuan nimin zing khan a tarlang. Hri kai thar hmuhchhuah tharte nen hri kai tawh zawng zawng hi 33,504,534 an awm tawh a ni.

Ramchhungah hri kai mek, active case chu 8,606 in an kiam bawk a, hri kai mek hi 3,09,575 an awm a ni. Hri kai hmuhchhuah tawh aṭanga chhutin active case chu 0.92% an ni a; March 2020 hnua active case an tlem ber ṭum a nih thu ministry chuan a sawi. Hei hi thla ruk hnu emaw ni 184 hnua a hniam ber ṭum a ni.

Hmasawnna dang awm lehin, Covid-19 kai aṭanga dama chhuahtir chu 97.75% a ni mek a, March thla hnua a dampui zat san ber ṭum a ni bawk. Dama chhuahtir 34,469 awm belh leh te nen ramchhunga hri kai dama puan chu 32,749,574 an tling tawh a ni.

Hetih lai hian, hri vanga thi 254 an awm belh leh. Hripui vanga thi hi mi 4,45,385 awm tawhin, hri kai tawh zat aṭanga 1.33% an ni.

Health Ministry chuan kartin (2.08%) leh nitina (1.85%) hri kai zat chu 3% hnuailamah awmin, ni 88 leh ni 22 chhung ve ve a awm tawh tih a sawi bawk.

September 20 khan sample 1,413,951 endik leh niin, sample lak tawh zat chu 555,035,717 a nih thu Indian Council of Medical Research (ICMR) chuan tarlang.

Vaccine pekchhuah lamah January 16 aṭanga semchhuah anih aṭang khan dose 818,513,827 chuang semchhuah a ni tawh a, an zinga dose 9,646,778 te chu Thawhṭannia sem kha an ni.