Kathua leh Unnao-a pawngsualna thleng duh loh vangin kawngzawh huaihawt
Congress president Rahulh Gandhi leh party hruaitu hlunte hoin Ningani zanlai khan New Delhi-a India Gate-ah Kathua, Jammu and Kashmir-a hmeichhe naupang kum riat mi rawng taka pawngsuala thah leh, Uttar Pradesh-a Unnao-a hmeichhe tleirawl kum 16 mi pawngsual duh lohna lantirin bati chhi a kawngzawh huaihawt a ni.
India Gate pana kawngzawhnaah hian Rahul Gandhi-a farnu, Priyanka Vadra leh a pasal Robert Vadra bakah a nu, Sonia Gandhi-te pawh an tel. Congress worker ṭhahnem tham tak an tel bawk.
Rahul Gandhi chuan pawngsualna rapthlak tak tawktuten rorelna dik an hmuh theih nan sorkar chu hma la tura an duh thu a sawi. Ramchhungah hmeichhe leh naupang pawngsual leh thahna te a thleng fo a, hetiang pawikhawihna rapthlak tak thleng ṭhin hi veng tura theihtawp chhuah a ngai a ni tiin, he thil hi politics lam thil ni loin, ram thil a ni, a ti. Hmeichhiate chunga hleilenna thleng ṭhin titawp tura sorkarin hma a lak a ngai a ni, tiin a sawi.
Kawngzawhnaa tel, Congress hruaitu Ghulam Nabi Azad chaun Prime Minister Narendra Modi-a kaihhruai sorkar chu sawiselin, sorkar chu a muthlu rei tawh lutuk a, Congress-in a kaihthawh a ngai a ni, a ti. PM chuan hmeichhe naupangte venhim leh chawikanna tur campaign, 'Beti Padhao, Beti Bachao'-te siam mah se, a hun chhungin hmeichhe naupang pawisawi loten pawngsual an tawk fo a ni, a ti.
Kathua Case
Kumin January 10 khan J&K-a Kathua district-ah Muslim mi, hmeichhe naupang kum riat mi Asifa chu rukho niin, ni eng emawzat hrenbehin pawngsual rawn a ni a, pawngsualtu zingah hian police officer-te pawh an tel. Hren beh a nih chhung hian damdawiin an hrai rui a, ei tur pawh pek a ni ngai lo. Kar khat hnuah a ruang hi hmuh a ni. He pawikhawihna rapthlak tak thlenga inhnamhnawih mi pariat chu man an ni tawh a, man zinga mi revenue department official hlui chuan he thil hi Asifa-te hnema, Bakherwal hnam ho tihṭhaihna atana ti an nih thu leh, Rassana bial aṭanga an umchhuah theih nana ti an nih thu a sawi. Bakherwal hnam, Muslim mi chhungkaw tlemte chu Hindu tamna bialah hian an khawsa ve a, hei hi Hindu ho hian an ngaithei lo hle a ni. Pawngsualtute laka thubuai ziahluh tum hi Kathua District Bar Association leh Jammu-a High Court Bar Assocation chuan dodalin hna an thawk duh lo a, pawngsual tawktu chhungte ukil hman tur pawh an lo dansak a ni.
Unnao case
Uttar Pradesh-a Unnao khuaah nikum June thla kha hmeichhe tleirawl kum 16 mi chu pawngsual a ni bawk a, pawngsualtu hi BJP MLA Kuldeep Singh Sengar niin a puh. Pawngsual tawktu chhungten Sengar laka FIR thehluh an tum chu police-ten ṭum eng emaw zat an lo dansak nia sawi a ni a, pawngsual tawktu pa pawh police kuta a awm laiin kut thlak a ni a, Thawhṭanni khan a hliam tuar loin damdawi-inah a thi a ni. Unnao khuaa pawngsual thubuai chhui hna hi Uttar Pradesh chuan Central Bureau of Investigation (CBI) kutah a hlan tawh bawk. CBI chuan Ningani khan MLA Sengar lakah hian thubuai a ziak lut.
Kum tlinglo pawngsualtu thi tura hremna pek duh
Jammu and Kashmir Chief Minister Mehbooba Mufti-i chuan Kathua district-a hmeichhe naupang pawngsual leh thahna rapthlak tak thleng chu a dem thu a sawi a, state sorkar chuan kum tling lo pawngsualtute thi tura hremna pek an nih theihna turin dan khauh tak a siam tur thu a sawi. CM Mufti-i chuan a kaihhruai sorkar chuan hetiang thil rapthlak tak hi naupang dangin an tawh lohna turin theihtawp a chhuah dawn tih a sawi bawk. Kathua pawngsual leh inthahna rapthlak tak thlenga mawhphurtute hremna na tak pek an nih theihna turin an bei zel dawn tih a sawi.
Union Minister for Women and Child Development Maneka Gandhi pawhin Kathua-a thil thleng chuan a rilru a ti na takzet tih a sawi a, pawikhawihtute chu Protection of Children Against Sexual Offences Act (POCSO) Act hnuaiah thi tura hremna pek an nih ngei theihna turin a ministry chuan a ngen dawn tih a sawi. Maneka chuan POCSO siamṭha tur hian cabinet-ah rawtna thlen an tum tih a sawi bawk a ni.
Supreme Court chuan Kathua pawngsual leh inthahna thleng chungchang hi a enfiah dawn tih sawiin, Jammu and Kashmir-a Bar Council hnenah pawngsualtute puhte lakah chargesheet siam an lo dan chhan sawifiah turin a ti.