Delhi-ah halmawi leh Halpuah khap

National Green Tri­bunal (NGT) chuan nimin khan thuchhuah tichhuakin, Delhi-ah November 9 zanlai aṭanga November 30 thleng halmawi leh hal­puah (firecracker) lei leh hralh a khap. 

He thupek hi National Capital Region (NCR) huamchhunga awm Ghaziabad, Faridabad, Gurugram leh Greater Noida-te pawh a huam tel bawk a ni. 

November 14 hi Diwali festival a ni a, hemi ni hian halmawi/halpuah nasa taka hal ṭhin a ni a, hei hian boruak bal a siam nasa thei hle ṭhin. Hemi avang hian NGT chuan Delhi-a boruak bal lutuk avangin mihring hriselna atana thil ṭha lo a thlen theih tur chu venna atan khapna hi a tichhuak ta a ni. 

Pathiannia Delhi-a air quality index (AQI) chu 416 a ni a, Ghaziabad chu 456, Faridabad 426, Gurugram 434 leh Greater Noida chu 440 a ni tih Central Pollution Control Board chuan a tarlang. AQI 201–300 inkar hi 'poor' tih a ni a, hemi chin hian mihring hriselna kawngah harsatna a thlen thei a ni. 

AQI 401–500 inkar chu 'severe' tih a ni a, NCR-a air pollution level chuan hei hi a thlen chhoh mek avangin an dinhmun a ngaihtuahawm a, hei vang hian NCR huamchhung chu AQI 201–300 inkarah tal a awm theih nan National Green Tri­bunal chuan hma a la ta a ni.

Delhi leh a chhehvelah hian kumtinin thlai ro hal nasat avangin thlasik laiin boruak bawlhhlawh hi a nasa zual ṭhin a, hei bakah hian Diwali festival-a halmawi/ halpuah hal nasat ṭhin vangin boruak bal hi a nasa phah ṭhin bawk.

India rama Covid-19 hri kai an pun ṭan tirh khan Delhi hi a kai nasa ber a ni nghal a, tlema an ziaawm hnuah October thla aṭang khan hri kai an pung chak leh tawh hle a ni.

Ni nga liam ta chhung khan Delhi-a hri kai thar hi nitin mi 6,000 chuang an awm ziah ang a ni a, Pathianni kha Delhi-a Covid-19 hri kai tam ber ni niin, hemi ni hian hri kai hmuh chhuah thar mi 7,745 an awm.

Covid-19 hri vanga thi hi mi 6,989 an awm tawh a, hri kai tawh zawng zawng hi mi 4,38,529 an awm bawk.