Quad Leaders Summit hmang turin PM-in US a pan

Prime minister Narendra Modi chu September 24-a neih tur Quad Leaders Summit hmang turin nimin khan US a pan a, ni thum a cham ang. A cham chhung hian New York-a UN General Assembly neih mekah pawh thu a sawi dawn a ni.

Quad Leaders Summit hi White House-ah neih a ni dawn a, US president Joe Biden chuan a kaihhruai ang. Ram pali inzawm khawm pawl (US, Japan, Australia leh India) Quad Summit-ah hian PM Modi bakah Australian prime minister Scott Morrison leh Japan prime minister Yoshihide Suga pawh tel turin an ram an chhuahsan tawh.

Quad member ram palite hian kumin March thla khan virtual hmangin meeting an lo nei ho tawh a, he meeting-a an thu khel ṭhenkhatte chu khel chhunzawm leh an tum bakah Afghanistan-a Tabilan sorkar thar piang chungchang te, khawvelin Covid-19 a dona chungchanga hmalakna tur hrang hrang te, UNGA-in hmalakna a siam te leh Indo-Pacific-a hmalak dan turte chu Quad summit-ah an ngaihtuah ho dawn a ni.

A zinchhuah hma hian PM Modi chuan a twitter lamah US president Joe Biden-a'n zin tura a sawm thu a tarlang a, US leh India chu inlaichinna ṭha zawk an neih theih zelna tura zin a nih thu a sawi bawk. A cham chhung hian US vice president Kamala Haris nen ram pahnihte thawhhona tur chungchang leh khawvela thil thleng hrang hrangte an sawi dun tur thu a sawi bawk.