Covishield vaccine la te chauh US-ah zin thei rih dawn

United States (US) chuan November thla aṭangin coronavirus vaccine dose kima la tawh khualzinte chu an ramah luh an phal tawh dawn. India chu phalna an pek ram 33 zinga telin, India siam vaccine zingah Covishield vaccine chauh a pawm rih thung.

November thla aṭanga khualzin luh a phal turte hi Europe-a Schengen ram 26 an tel a, an zingah hian France, Germany, Italy, Spain, Switzerland, Greece bakah Britain, Ireland, China, India, South Africa, Iran leh Brazil-te pawh an tel a ni.

White House chuan khualzin luh an phal dawn thu an sawi rual hian, vaccine pawm chungchanga thutlukna chu Centers for Disease Control and Prevention (CDC) kutah a awm dawn tih a sawi bawk. CDC hian Food and Drug Adminsitration ( FDA ) pawmpui emaw World Health Organization (WHO) pawmpui vaccine dose bikim emaw la tawh chu an rama lut turin a phalsak dawn tih a sawi.

Ramdang aṭanga lut turte chuan an zin hmain vaccine an la tawh tih finfiahna an neih a ngai dawn a, US an thlen hunah inkhunghran a ngai dawn lo a ni.

Tun thleng hian WHO chuan vaccine pasarih chiah a la pawmpui a, chungte chu - Moderna, Pfizer-BioNTech, Johnson & Johnson, Oxford-AstraZeneca, Covishield ( Oxford-AstraZeneca formulation) leh China siam Sinopharm leh Sinovac vaccine te an ni.

India rama siam, Bharat Biotech vaccine Covaxin chuan WHO leh US FDA te pawmpuina a la hmu lo a ni. Covaxin hi India rama drug regulator in vaccine an pawmpui paruk zinga pakhat niin, rampumah Covishield leh Sputnik V te rualin semchhuah mek a ni.

Covaxin hi tun thla chhung chuan WHO chuan pawmpuina an la tihchhuah hman rin a la ni lo tih official te chuan an tarlang. US chuan June thla khan emergency-a hman atan an dilna chu a lo hnawlsak tawh bawk.

India-in thla leh aṭanga ramdang hnena vaccine thawnchhuak leh pechhuak tura thuthlukna a siam tukah US hian he thuthlukna hi an siam ve leh a ni. India hi khawvela vaccine siamchhuak tam ber a ni a, ramchhung mite tan vaccine tam zawk semchhuah a duh avangin kumin April thla aṭang khan vaccine thawnchhuah hna hi a lo chawlhsan tawh a ni.

Ni 186 chhunga active case tlem ber ṭum thleng
India ramah nimin khan Covid-19 hri kai mek, active case mi 3,01,989 awmin, ni 186 hnua active case an tlem ber ṭum a ni.

Hri kai mek hi hri kai hmuhchhuah tawh, 3,35,31,498 aṭangin 0.90% ah a tla thla tawh a ni. Hri kai enkawl dam, recovery rate pawhin hma a sawn chho zel a, nimin khan 97.77% niin kum 2020 March thla hnua recovery rate a san ber ṭum a ni bawk.