PM-CARES hi sorkar fund a ni lo, RTI-in a huam lo : Sorkar laipui

Sorkar laipui leh Prime Ministe Office (PMO) chuan Prime Minister’s Citizen Assistance and Relief in Emergency Situation Fund (PM-CARES Fund) chu India sorkar pawisa a nih loh thu Delhi High Court a hrilh. PM-CARES fund chu Right to Information (RTI) Act huanga lakluh theih a ni lo tih a sawi bawk.

PM-CARES Fund legal status chungchang court-a zawhna a chhanaah sorkar chuan hei hi a sawi a ni. Sorkar laipui affidavit thehluh chuan fund chu mipuite ṭanpuina tura din a nih thu leh, Constitution of India hnuaiah emaw, hemi hmang emawa din a nih loh thu chief justice DN Patel kaihhruai bench a hrilh a ni.

Sorkar laipui chuan PM-CARES hnuaia rawn lutte chu India sorkar kuta lut tur emaw eng sorkar mahin an thunun leh, hmanrua atana an hman theih loh a nih thu a sawi bawk.

"PM CARES Fund hi mimal leh pawl ten a thlawna an thawhkhawm a ni a, eng sumdawnna emaw sorkar laipui hlawkna emaw tur zawnga ruahman a ni lo. PM CARES Fund hi sorkar scheme emaw sorkar laipui sumdawnna emaw tura tih a ni lo a, public trust a nihna angin Comptroller and Auditor General of India (CAG) thuhnuaia awm tur a ni hek lo," a ti.

"PM CARES Fund hi RTI Act Section 2(h) hnuaiah “public authority” huang chhungah a awm thei lo a, hetiang anih avang hian petition thehluh pawh hi hnawl theih a ni," tiin sorkar laipui chuan affidavit-ah hian a tarlang a ni. Hei bakah hian Trust kalphung chu state sorkar emaw, sorkar laipui emawin an duh anga an thunun theih a ni lo tih a sawi bawk.

Lawyer Samyak Gangwal chuan PM CARES Fund chu constitution hnuaiah 'State'-a puang turin a ngen bawk a, hei hi a kalphung leh sum hman danah langtlang zawka kalpui theihna tur a nih thu a sawi. Hemi chungchang hi September 27 hian court chuan a ngaihtuah leh ang.

India rama Covid-19 hri a len hnu, nikum March 27 khan hri leng vanga harsatna tawkte chhawmawlna leh ṭanpuina turin Prime Miniter chuan PM-CARES fund hi a siam a ni. Mahse pawisa thawhtute chungchang langtlang taka kalpui a nih loh avangin activist, lawyer leh political party hrang hrang aṭangin zawhna leh sawiselna a awm fo a ni.