Covid-19 vanga thi chhungte Rs 50,000 pe turin rawt

Ministry of Home Affairs chuan Supreme Court hnenah National Disaster Management Authority (NDMA)-in Covid-19 hri vanga thi chhungte hnenah Rs 50,000 pek a rawt tih a sawi.

Hri vanga thi ralna sum hi state sorkar chuan State Disaster Response Fund (SDRF) aṭangin a pe ang a, District Disaster Management Authority/district administration-ten mitthi chhungte hnenah sum hi an pe ang. Chhawmdawlna sum pek hi death certificate-a an thih chhanah Covid-19 tih ziah ngeite hnenah chauh pek tur a ni thung.

Kumin June 30 khan advocate Gaurav Bansal-a petition thehluh behchhanin, Supreme Court chuan Distaster Management Act of 2005-a Section 12 (iii) hnuaiah NDAM chu Covid-19 vanga thi chhungte chhawmdawlna pek dan tur kaihhruaina siam tur hian a lo ti tawh a ni.

NDMA-in kaihhruaina a siamah hian Covid -19 hri vanga thi chhungte chhawdawlna pek hi hriattirna dang tihchhuah a nih hma chuan hman chhunzawm zel turin a ti a ni. Hri leng chu a la reh lo a, hri vanga thi zat pawh an la pung belh zel thei tih sawiin, hei vang hian sum pek zat tur pawh hi fimkhur taka an rel a ni tih a sawi.