Bihar inthlana candidate zingah Thubuai nei mi 1157 an awm

Bihar legislative assembly inthlan neih zawh takah candidate zingah mi 1,157 chu thubuai nei lai an ni tih Election Commission chuan a tarlang.

Kar liam ta Inrinni khan Bihar inthlan thawh thumna leh a thawh hnuhnung ber chu zawh fel a ni.  

Bihar inthlanah hian candidate 3,733 an awm a, heng zinga candidate 371 chu hmeichhia an ni. 

Kumin February thla khan Supreme Court chuan Election Commission hnenah hriattirna tichhuakin, political party-te chuan eng vangin nge an party aṭanga thubuai nei lai candidate an pek ṭhin tih chu zawtfiah turin a lo ti tawh bawk. 

September thla khan EC chuan Bihar inthlana candidate zinga thubuai nei chu an thubuai chungchang TV leh chanchinbua chhuah turin a hriattir a ni. He hmalakna hi kum 2018 khan EC chuan chhuah ngei ngei tura a tih vang a ni. 

October ni 28 (1,066 candidate) khan Bihar inthlan thawh khatna neih a ni a, November 3 (1,463 candidate) khan a thawh hnihna neih leh niin, November 7 (1,204 candidate) khan  a thawh thumna chu zawh fel a ni. Inthlan result hi vawiin hian puan a ni ang.