BKU hruaituin US-a India mite Farm Law duh lohna lantir turin ngen

Bharatiya Kisan Union (BKU) hruaitu Rakesh Tikait chuan US-a cham mek, prime minister Narendra Modi-a'n vawiina New York-a hun a hman laiin, a kaihhruai sorkarin Farm law thar pathum a siam duh lohna lo lantir turin US-a India mi awmte chu a ngen.

PM Modi hian vawiin hian UN General Assembly session 76-na neih mekah thu a sawi dawn a ni.

Rakesh Tikait chuan video message tichhuakin, Delhi border-a loneituten thla 10 chuang farm law duh lohna lantira nawrh an lo huaihawt tawh an thlawpna lantir turin India mite chu a ngen. PM Modi nena meeting an neih hunah pawh India ram loneitute chungchang chu sawipui turin US president Joe Biden chu a ngen bawk a ni.

Tikait chuan, "Thla 10 chuang nawrh huaihawtin, Delhi border-ah kan inkulh tawh a ni. Hemi chhung hian loneitu zinga mi 750 chuangin nunna an chan tawh bawk a, mahse sorkar chu inbiakna min neihpui turin a la inpeih chuang lo. Kan thil phut lantirin thlasik, nipui leh fur hun pawh kan tuar tawh a ni," a ti.

Delhi border-a hmun thum - Singhu, Tikri leh Ghazipur-ah kum 2020, November thla aṭang khan ram chhunga loneitu hrang hrangte chuan Samyuka Kisan Morcha (SKM) tih hming farm law duh lohna hi an lo lantir tawh a ni. Sorkar nen pawh ṭum 11 inbiakna lo nei tawh mah se an la inrem thei lo. Loneitute hian heng dan siam thar pathumte hi sut leh vek an phut a, mahse sorkar lam hian sut loin siamṭhat a rawt thung.