Covid-19 kai thar 31,382 awm belh leh

India ramah Covid-19 hri leng chuan ziaawm lam pan chho zelin Ningani khan hri kai thar 31,382 an awm belh leh a, hri vanga thi 318 an awm tih Health Ministry chuan a tarlang.

Hri kai mek, active case chu total case aṭanga 0.89% ah a tlahniam tawh bawk.

Kerala-ah hri kai thar 19,682 leh thihpui 152 awmin, hri kai tawh zat chu 45,79,310 an tling tawh a,hri vanga thi 24,191 an awm tawh bawk.

Hri kai thar 3,320 awmna Maha­rashtra-ah chuan hri kai hmuh chhuah tawh mi 65,34,557 an nei tawh. State chhungah hian hri kaihhnawih vanga thi 61 awm belh lehin thihpui tawh zat chu 1,38,725 an tling tawh a ni. Maharashtra hian active case 39,191 a nei mek a ni.

Hri kai hmuhchhuah tawh aṭanga active case chu 0.89% ni mekin, nikum March thla hnua a hniam ber ṭum a ni. Hri kai thar zat aṭanga 62.73% te chu Kerala-a hmuhchhuah niin, ramchhung state zinga active case nuai khat chuang nei awmchhun a ni bawk.

Covid-19 kai dam leh tawh chu 97.78% a ni mek a, hei pawh hi March 2020 hnu lama a san ber ṭum a nih thu Union Health Ministry chuan a sawi. Nitina hri kai hmuhchhuah zat, daily positivity rate - mi za an test aṭanga positive zat - chu 2% hnuailamah awmin, ni 23 chhung a awm tawh a ni.

Ramchhunga district 33-te chuan kartina hri kai thar zat, weekly positivity rate 10% chunglam an la nei a, district 23-te chuan 5-10% inkar an nei tih health official te chuan an sawi.

Puitling vaccine la thei chin zinga 66% te chuan Covid-19 vaccine dose khatna an la tawh a, 23% te chuan dose kimin an la tawh tih sorkar thuchhuak chuan a puang. Ningani khan ramchhungah vaccine dose nuai 65 chuang semchhuah leh niin, rampumah vaccine dose vaibelchhe 84 chuang semchhuah a ni tawh.

State leh union territory-ten vaccine la hman loh vaibelchhe 4.29 chuang an la kawl tih Health Ministry chuan a sawi. Hei bakah hian pekchhuah mai tur dose nuai 64 a la awm mek bawk.

Ningani khan sorkar laipui chuan rualbanlo leh taksa lama harsatna bik neite chu an chenna inah Covid vaccine pek an nih tur thu a puang.

December 2019-a China aṭanga Coronavirus rawn darh chhuah aṭang khan ram hrang hrangah mi 47,05,691 in an thihpui tawh. US chu hri leng tuar na ber niin, hri vangin mi 6,73,728 an thi tawh a, Brazil-ah 5,92,964, India-ah 4,46,368, Mexico-ah 2,72,580 leh Russia-ah 2,01,445 thi an awm tawh bawk.