Defence ministry-in Arjun Mk-1A tank 118 lei dawn

Defence ministry chuan Ningani khan Heavy Vehicles Factory, Avadi hnenah ramchhunga siamchhuah Arjun Mk-1A tank 118, Rs vaibelchhe 7,523 man chuang lei turin order a siam.

Sorkar laipui chuan Atmanirbhar Bharat Abhiyan (self-reliant India campaign) hmanga ram chhunga siamchhuah ngei, medium transport aircraft leh airbone early warning system hmanga India Air Force thuamchakna tur project, Rs vbc 33,000 hu a lo pawm tawh a ni.

Thla sarih liam ta khan Defence Acquisition Council (DAC) tank lei phalna hi a lo pe tawh bawk. Arjun Mk-1A hi tuna an hman mek, Arjun Mk-1 main battle tank (MBT) upgraded version a ni.

Tank tharte hian upgrade 72 an nei dawn a, danglamna lian tak tak 14 siam a ni bawk tih official te chuan an sawi.

"Mk-1A hi firepower dik leh chungnung zawk hmanga thuam a ni a, advanced technology system a hmang dawn a, khawi hmunah pawh hman theih niin hmelmate beihna atan chhun leh zanah pawh hman theih tur a ni," tiin defence ministry thuchhuah a tarlang. Tank leina tura order siamah hian Indian vendor 200-te an inhnamhnawh dawn bakah,hna thar 8,000 chuang a siam beisei a ni.

Mk-1A tank pangate hi thla 30 chhunga peihfel hman tum a ni a, hemi zawh hian kumtinin tank 30 pekchhuah leh tum a ni.