Kathua pawngsual thubuai ngaihtuah tan

Jammu and Kashmir-a Kathua district-a hmeichhe naupang kum riat mi pawngsual rawn leh thah a nih chungchang thubuai chu nimin khan ngaihtuah ṭan a ni.

Kathua district-a temple pakhatah hmeichhe naupang hi kar khat chhung khung beh niin pawngsual rawn a ni a, a hnuah thah zui a ni. Hrenbeh a nih lai hian ei tur pawh pe loin, damdawiin an hrai rui nia sawi a ni bawk. He pawikhawihna rapthlak tak thlenga inhnamhnawih mi pariat chu thubuai siamsak an ni a, an zingah hian police officer-te pawh an tel.

Pawikhawihtute zingah hian kum tling lo pakhat a awm a, a chungthu hi CJM court-ah ngaihtuah a ni ang a, midang pasarihte chungthu hi sessions court-ah ngaihtuah a ni thung ang.

Hetih lai hian Bar Council of India (BCI) hnuaia member panga awmna fact-finding team chuan Kathua hi tlawhin, thil awmdan an zirchiang dawn a, April 19 hian Supreme Court-ah report an thehlut ang. Team member-ah hian CBI hotu hlui Tarun Agarwal, BCI co-chairmen S Prabakaran leh Ramachandra G Shah, Bar Council of Uttarakhand member Razia Beig leh advocate Naresh Dikshit te an tel.

BCI team hian Bar Associations of Jammu leh Kathua hruaitute hmuin, pawngsual tawktu chhungte leh mipuite pawh an kawm kual dawn a ni.

Pawngsualtua puhte man an nih duh lohna lantira kawngzawh huaihawt thlawptu, BJP minister pahnih Chandra Prakash Ganga leh Lal Singh-te banna thehluh chu Chief Minister Mehbooba Mufti-i chuan a pawmsak tawh bawk. Banna pawmsak an nih hnuah Lal Singh chuan CM Mufti-i pawh chu mawhphurhna laa CM a nihna aṭanga bang tura a phut thu a sawi. Singh chuan hmeichhe naupang duhsaktu an nih tih sawiin, boruak ṭha a awm theihna turin an bang niin a sawi a, hmeichhe naupang tan rorelna dik an duh tih a sawi. He hmeichhe naupang ruang hi a bo aṭanga ni sarih hnuah chauh hmuh a ni a, hei vang hian Home portfolio changtu CM Mufti-i chuan he thil thlengah hian mawhphurhna lain a bang tur a ni, a ti.

Kathua-a naupang kum tlinglo chunga pawikhawihna rapthlak tak thleng duh lohna lantirin Pathianni khan ramchhung khawpui hrang hrangah kawngzawh huaihawt a ni.