Europe ram tlawh turin PM a zin

Prime Minister Narendra Modi chu ni nga chama Sweden, United Kingdom leh Germany tlawh turin nimin khan a zin.

PM Modi hian nimin zing khan Sweden khawpui Stockholm a pan a, vawiinah Sweden Prime Minister Stefan Lofven nen meeting an nei dawn a, tlai lamah UK a pan nghal ang. A zinchhuah hmain PM chuan a twitter-ah India leh Sweden chuan inlaichinna ṭha tak an neih thu sawiin, Sweden PM nena an inkawm hunah sector hrang hrang–business, science and technology, energy leh smart city chungchangah thawhdunna thuk zawk siam dan turte an sawidun tih a tarlang. Sweden leh India hian vawiin hian Stockholm-ah India-Nordic Summit an buatsaih dun dawn a, hei hi Modi hian a hmanpui dawn bawk a ni.

UK-ah a thlen hunah Prime Minister Theresa May leh Queen Elizabeth-te hmuin, April 19 leh 20 hian Commonwealth Heads of Government Meeting (CHOGM)-ah a tel bawk ang. Healthcare, innovation, digitisation, electric mobility, clean energy, leh cyber security lama India-UK thawhdunna tihlen dan tur a ngaihtuah dawn tih Modi chuan a sawi. A cham chhung hian London-ah Ayurveda Centre of Excellence pawh hawn a ni ang.

UK aṭanga a rawn haw kawngah PM hian Germany-ah reilote chawlin, Berlin-ah German Chancellor Angela Merkel-i a kawm dawn bawk a ni.