Team India-in ni tin record thar kan siam belh zel : PM Modi

Prime minister Narendra Modi chuan nimina thla tina radio programme a hman ṭhin, Mann Ki Baat programme-a thu a sawiah, Team India chuan coronivurs dona kal zelah vaccine semchhuah kawngah record thar a siam zel tih a sawi.

Covid vaccine sem chhuahnaah India chuan nitin record a siam zel thu a sawi rualin, PM Modi chuan hunpui lo thleng turah mipuite chu inthlahdah lo turin a ngen zui nghal bawk.

"Hunpui lai hian kan theihnghilhmiah loh tur pakhat a awm a- chu chu India ramin Corona kan dona hi a ni," tiin PM Modi chuan a sawi.

Prime Minister Narendra Modi piancham vawi 71-na September 17 khan India chuan record thar siamin nikhatah covid vaccine vaibelchhe 2.5 chuang a semchhuak a ni. Hemi atana sorkarin target a siam chu dose 10,390 in an pel a ni.

Hemi hma hian ni khata vaccine semchhuak tam ber record awm chu China siam niin, June thla khan ni khatah vaccine dose vaibelchhe 2.47 a sem chhuak a, mahse India chuan a khum ta a ni. India-in dose vaibelchhe hnih chuang an semchhuak thei hi World Health Organization South-East Asia office pawhin twitter kaltlangin lawmpuina a hlan a ni.

"Vaccine semchhuah kawngah India chuan khawvel huap pawha sawizui hlawh record tam tak a siam a ni. India mipui tinten hri dona kawngah hian chanvo pawimawh tak an nei vek a ni. Kan hun a thlenin vaccine kan la zel tur a ni a, vaccine la lo an awm em tih uluk takin kan enzui tur a ni," tiin PM chuan a sawi.

PM chuan vaccine dose bikima lak zawh hnu pawhin hri leng laka invenna pawimawh, taksa inkar hlata awm te, mask vuah ṭhat te, hriselna vawn uluk te chu te chu chhunzawm zel tur a nih thu sawiin, "Team India chuan he inbeihnaah hian hnehna puanzar kan vai leh theih ngei ka beisei a ni," a ti.

Tun hnai khan India chuan nikhat chhunga Covid dose vaibelchhe khat chuang semchhuah ni vawi thum - September 6, August 31 leh August 27 a nei.

Vaccine hi dose vaibelchhe 10 semchhuak turin ni 85 an mamawh a, vbc 20 thleng turin ni 45 dang mamawh belh lehin , vbc 30 thleng turin ni 29 an mamawh tih health ministry chuan a sawi.

Rampumah vaccine semchhuah hi January 16 aṭang khan neih ṭan niin, healthcare leh frontline worker te chu dose la hmasa berte an ni. May thla aṭangin puitling, kum 18 chin hnenah semchhuah leh a ni.

Hetih lai hian Congress hruaitu Rahul Gandhi chuan Covid-19 vaccine semchhuah kawnga record siam hnuah vaccine semchhuah hna hi a tlahniam leh nasa hle tih sawiin, a finfiahnaah CoWin website-a graph pawh a tilang. PM Modi piancham puala vaccine semchhuah tam record siam ni khan, Madhya Pradesh-ah vaccine la lo, mahse la anga vaccination certificate pekchhuah an awm nia sawi a ni bawk.

Sorkar laipui chuan hun eng emaw chen ram pawn lama Covid vaccine thawnchhuah a tihtawp hnuah, a thawnchhuak leh dawn tih a sawi.