Lalu leh a chhungte lakah thubuai ziak lut

Central Bureau of Investigation (CBI) chuan Thawhṭanni khan Railway minister hlui leh Rashtriya Janata Dal (RJD) hotu Lalu Prasad Yadav, a nupui Rabri Devi, a fapa Tejashwi Yadav leh a thawhpui hnai MP Prem Chand Gupta bakah midang 10-te lakah private firm hnena IRCTC maintainance contract pek chungchangah thubuai a ziaklut.

CBI hian nikuma FIR a thehluhah, Indian Railways subsidiary Indian Railway Catering and Tourism Corporation (IRCTC) chuan kum 2006 khan Ranchi leh Puri-a hotel enkawlna tur contract chu Benami firm kaltlanga Patna-a ram acre thum-a zau neih theihna turin Sujata Hotel hnenah a pe niin a sawi. Sujata Hotel hi Vinay leh Vijay Kochhar-te ta a ni a, he thil thlen lai hian Lalu Prasad hi railway minister a ni.

FIR-ah hian Lalu chuan Kochhar-te duhsakna lantir nan hian a thuneihna dik lo takin a hmang nia sawi a ni. Benami firm, Delight Marketing Company hi MP Prem Chand Gupta-a nupui, Sarla Gupta ta a ni a, thubuai ziahluhah hian a hming pawh tarlan tel a ni.

CBI chuan Sujata Hotel hnena contract pek a nih hnuah, Delight neitu hming hi Sarla aṭangin Rabri Devi leh Tejashwi Yadav-te hminga thlak a ni tih sawiin, neitu hming thlak hi kum 2010-2014 inkar thleng niin a tarlang.

Dik lo taka contract pek nia sawi chungchang a chhuinaah, CBI chuan Lalu leh Rabri-te chu thu an zawt tawh a, Patna, Delhi, Gurgaon, Puri leh Ranchi-a an chhungkaw inte pawh kum 2017, July 7 khan an lo dap tawh bawk.