Minister Irani-i zuitu DU zirlaite thubuai siamsak

Delhi Police-te chuan nimin khan kum 2017-a union minister Smriti Irani-i zui a, mawi lo taka chea puh Delhi University zirlai pali te lakah thubuai an ziaklut.

Thubuai hi Metropoli-tan Magistrate Snigdha Sarwaria-a hnenah theh luh niin, October 15-ah ngaihtuah a ni ang. DU zirlai pali – Sitanshu, Karan, Avinash leh Amit te chu mi zui ruk, pawi-khawina thlen tum leh hmeichhe zahawmna hmusit zawnga chea puhin thubuai siamsak an ni. Heng zirlai pali-te hian kum 2017, April thla khan rui chungin Irani-i car chu Delhi-ah an umzui a, police-ah complain thehluh a nih hnuin Irani-i umzuitu car hi police-te chuan lo dangin zirlaite hi an man a ni. Zirlaite hi kum 18-19 inkar an ni a, Chanakyapuri police station-ah hun eng emaw chen hren zui an ni.