ATM-a pawisa awm loin mipuite tihlauthawng

Ramchhunga state hrang hrangah ATM chhia leh pawisa lakchhuah tur awm lo chuan mipuite a tihlauthawng hle a, mahse Union Finance Minister Arun Jaitley-a chuan hmun hrang hranga pawisa indaihlohna awm chu chinfel thuai a nih tur thu a sawi.

New Delhi bakah Maharashtra, Gujarat, Karnataka, Andhra Pradesh leh Rajasthan state-ahte ATM-te chu a chhiat bakah, a chhe loah pawh pawisa lakchhuah tur a awm lo a, hei vang hian mipui pawh an phunnawi nasa hle. Hetiang harsatna hi kum 2016, November thlaa sorkar laipuiin pawisa note lian pahnih, Rs 1,000 leh Rs 500 a tih thih hnu lawkah a thlen avangin mi tam tak rilruah hlauhthawnna a awm phah a ni.

Sum lam indaih lohna avangin bank ṭhenkhat chuan sum lakchhuah theih zatte bithliah an siam nia sawi a ni a, hei hi finfiah ni lo mah se enfiah thuai a ni dawn tih thuneitute chuan an sawi.

Union Finance Minister Arun Jaitley-a chuan a twitter-ah ATM harsatna thleng mek chungchang hi chhangin, hmun ṭhenkhata sum indaih tawk loh nia sawi chu chinfel thuai a ni dawn tih a sawi a, pawisa hi a tam tawk niin a sawi bawk.

MoS Finance SP Shukla chuan state hrang hranga pawisa note transfer tur hian Reserve Bank of India (RBI) chuan committee a din thu a sawi a, state ṭhenkhatin sum an neih tam laiin ṭhenkhatin an ngah tawk lo a, hei vang hian pawisa thawnkual vel dan tur ngaihtuah tur committee hi RBI chuan a din a, ni thum chhungin tihfel a ni ang, a ti.

Congress President Rahul Gandhi chuan state eng emaw zata harsatna thleng hi sorkar laipui beihna remchangah hmangin, Prime Minister Narendra Modi chuan India ram banking system chu a ti chhe zo niin a sawi.