Kathua pawngsual tawktu nihna tarlangtute sum chawi tir

Delhi High Court chuan Jammu and Kashmir-a pawngsual rawn hnua thah zui tak, hmeichhe naupang kum riat mi nihna puangzartu media house-te chu cheng nuai 10 ṭheuh chawi turin a ti.

Media house hrang hrang, pawngsual tawktu thlalak leh nihnate lo tarlang tute chuan cheng nuai 10 chawi tura tih niin, hen sumte hi pawngsual tawktu chhungte hnenah zángnadawmna atan pek a ni dawn tih High Court chuan a sawi. Hei bakah hian he hmeichhe naupang thlalak leh nihna thehdarhtu te chu thla ruk thleng lung-in tantir theih an ni bawk ang. Hemi chungchang hi April 25 hian ngaihtuah a ni leh dawn a ni.

President Ram Nath Kovind chuan India-in zalenna a hmuh aṭanga kum 70 hnuah hetiang pawikhawihna rapthlak thleng hriat tur la awm chu thil zahthlak tak a ni tih a sawi a, mitinten hetiang thil hi hmeichhe naupang leh hmeichhiate chunga a thlen tawh lohna turin mawhphurhna an nei vek tih a sawi. Prime Minister Narendra Modi pawh hun eng emaw chen pawngsual thleng chungchanga a tawngchhuak loh avanga sawisel a tawh hnuah ṭawngchhuakin, pawikhawihtute chu zuah an ni dawn lo a, "Kan fanute chuan rorelna dik an hmu dawn a ni", a ti.

Kathua-a hmeichhe naupang pawngsual rawna thah a ni leh, Uttar Pradesh-a Unnao-a hmeichhe tleirawl pakhat BJP MLA in a pawngsual duh lohna leh thilsualtitute hrem phutna hi ramchhung hmun hrang hrangah lantir a ni tawh a, April 16 khan New York-ah pawh rally huaihawt a ni. He hunah hian women's rights leh advocacy group, civil society leh sakhaw pawl hrang hrangte an tel a, an kawngzawh hi 'United for Justice Rally' tih an vuah. Kawngzawh hi Union Square-a Mahatma Gandhi lim bulah neih a ni.