West Bengal-a thlipui tlehah mi 13 thi

West Bengal-ah Thawhlehni tlai khan ruah leh thlipui a thawk a, chhiatna a thlenah mi 13 an thi.

Thli tleh hian thing-kung leh electric ban eng emaw zat a chhem tlu a, hetianga thli na hi kum 70 chhungin a la tleh ngai lo niin weather department chuan a sawi. Thil tleh nat zawng a tirah 84 km/hr niin a hnuah 90 km/hr-ah a kai chho a ni.

Thli leh ruah thawk hian public transport system pawh a tibuai hle a, thingkung tluten rel kawng an hnawh avangin rel te chu hun eng emaw chen dintir an ni a, NSCBI Airport-ah flight service pawh minute 100 vel a khaihlak phah a ni.

Kolkata municipal corporaton chuan thli tlehna hmuna hnawm-hnawk awmte thenfai hna thawk turin disaster management team a tir a, Fire department chuan hmun eng emaw zatah electric hrui chat vangin kangmei pawh a chhuak niin an sawi.