Jammu HC Bar Association-in lawyer nuarte thlawp lo

Jammu High Court Bar Association chuan nimin khan Supreme Court hnenah, Kathua-a naupang pawngsual rawn leh thah kaihhnawiha pawikhawihtute thlawpa zawnga lawyer nuarte chetdan chu an thlawp lo tih a hrilh.

January 10 khan Kathua-a Rasana khuah hmeichhe naupang kum riat mi chu rukbo niin, temple-ah kar khat chhung khung beha pawngsual rawn a ni a, a hnuah thah zui a ni. He pawngsualna thlenga inhnamhnawiha puh mi pasarih leh kum tling lo mi pakhat lakah thubuai ziahluh a ni. Pawngsualtua puhte lakah thubuai ziahluh a nih dawn hian lawyer-te chuan court pawn lamah lo dan an tum a, lungawi lohna an lantir chhunzawm a ni. Chief Justice of India Dipak Misra-a kaihhruai Bar Council of India chuan Kathua tlawh a, lawyer-te chet dan zirchiangtu tur team a din a, he hi high cour judge hluiin a ho a ni.

Hetih lai hian Kathua District Bar Association chuan Justice A M Khanwilkar leh D Y Chandrachud awmna bench hnenah April 12 aṭang khan nawrh an titawp tawh tih an hrilh. Lawyer-te nawrh huaihawt vang hian pawngsual tawktu pa chuan an thubuai hi Kathua aṭanga Chandigarh-a sawn turin a lo ngen tawh bawk a ni.

Supreme Court chuan Kathua pawngsual rawn leh tualthah thubuai kalpui tur tihbuai tum zawnga lawyer-te chet dan chu a ngai thutak hle tih sawiin, lawyer-te chuan pawngsual tawktute advocate-te dodal leh hnathawh tibuai zawnga thil ti lo turin a ti a ni.

Kathua-a hmeichhe naupang pawngsual rawn leh thah duh lohna lantirin ramchhung hmun hrang hrangah lungawi lohna lantir a lo ni tawh a, nimin khan Kashmir-ah pawh zirlaiten naupang vanduaina tawktu tana rorelna dik phutin nawrh an huaihawt. Nawrh huaihawt vang hian Kashmir Valley-a college leh higher secondary school-te khar vek a ni.