Goa CM chanchin dik lo thehdarhtu man

Goa Police Crime branch chuan an Chief Minister Manohar Parrikar-a a thi nia sawia Facebook-a thehdarhtu, Vasco khuaa mi chu an man. Parrikar hi a pum lam ṭhat lo avangin US-ah enkawl mek a ni.

Crime Branch chuan thu dik lo thehdarhtu, Vasco khuaa kum 35 mi Kenneth Silveira hi Nilaini khan manin darkar eng emaw zat thu an zawtfiah nghal a ni. Superintendent of Police (Crime Branch) Karthik Kashyap chuan Indian Penal Code Section 505 hnuaiah Silveira hi man a nih thu sawiin, magistrate hmaah hruai a ni dawn tih a sawi. IPC Section 505 hi mipuite tichiai thei zawnga thu dik lo thehdarhte hrem theihna a ni.

Silveria hian Thawhlehni khan a Facebook-ah Parrikar a thi tih thu hi a post a, a hnuah a thu post comment-tute aṭangin a thusawi chu a dik lo tih a hre leh a, mahse hetichung hian a wall aṭangin a thu post hi a delete chuang lo a ni. Hei vang hian police-te chuan Silveira hi man a ngai ta tih an sawi.

CM Manohar Parrkar hi kumin February 15 khan a pum na avangin damdawi-in panpui a ni a, hemi hnu hian Goa leh Mumbai-te panpui a ni. Thla hmasa khan in enkawl turin New York-ah hruai a ni a, thla hnih dawn chu office pawh a kal tawh lo a ni.

Eptute chuan CM dinhmun dik tak hi sawichiang turin phut ṭhin mah se, Chief Minister Office chuan Parrikar hi pum lam ṭha lo avanga enkawl mek ani tih bak a sawichiang duh lo. February thla khan journalist pakhat chu Parrikar-a damlohna chungchang a report avangin Goa Legislative Assembly-a a luh khapsak a lo ni tawh bawk.