AP CM-in special status pek phutin chaw nghei

Andhra Pradesh Chief Minister Chandrababu Naidu chuan nimin khan an state tana special status pek phutin nikhat chaw ngheia nawrh a huaihawt.

CM Naidu hian chaw ngheia nawrh 'Dharma Porata Deeksha' hi a pianchamah a buatsaih a, zing dar 7 aṭanga nei ṭanin, zan dar 7 thleng a kalpui a ni. Telugu Desam Party (TDP) president hian nawrh huaihawtna atan hian Vijayawada-a Indira Gandhi Municipal Stadium a thlang a, he hmunah hian a cabinet minister-te, MP, MLA leh MLC te pawhin an zawm a ni.

CM-in chaw nghei nawrh a huaihawt dawn hian sakhaw hrang hrang Hindu, Muslim leh Kristian hruaitute chuan mal an sawm a ni.

Naidu chuan Andhra Pradesh ṭhendarh a nih dawna AP Reorganistation Act hnuaia an state tana special status pekna chu a taka kalpui turin a phut. A piancham chu lawm loin, Prime Minister Narendra Modi-an an state a phatsanna duh lohna lantirna atan a hmang zawk tih a sawi.

Andhra Pradesh aṭanga Telangana state siam a nih kha, hetihlai central-a thuneihna changtu, Congress kaihhruai UPA sorkar chuan Telangana khawpui atana Hyderabad hman a nih dawn avangin Andhra Pradesh-in sum tam tak a hloh tur phurhruknan kum nga chhung ang special status pek a lo tiam a ni. Mahse Prime Minister Narendra Modi-a kaihhruai NDA sorkar chuan harsatna a awm nia sawiin, special status hi a pe duh lo a, hei ai hian special category status pek tur hu ang ṭanpuina sum pek a inhuam thu a sawi.

NDA sorkarin special status a pek duh loh vang hian TDP chuan central-a NDA an thawhpuina an tihtawp a, NDA sorkara an party minister pahnih pawh an bang tawh bawk a ni.