Pawngsualtua puh BJP MLA security pek tihtawpsak

Uttar Pradesh-a Unnao khuaa hmeichhe tleirawl pakhat pawngsualtua puh, BJP MLA Kuldeep Singh Sengar-a hnena 'Y' caterogy security pek chu nimin khan tihtawp a ni.

Nikum June thlaa Unnao khuaa hmeichhe tleirawl pawngsual rawnna thlengah BJP MLA Sengar hi puh tel niin, kar hmasa khan police-ten an man an ni. Pawngsualtu hian Sengar laka FIR thehluh a tum chu politician thiltithei tak nih avangin UP police-ten an lo ziaklut duh lo niin a sawi a, hemi hnu hian a chunga thil thleng hi ngaihven a nih theih nan MLA in kawtah hian ṭum hnih inhalhlum a tum a, mahse an chhan hman ve ve a ni. He thil thlen hnu leh mipui lungawi loten thawm an neih hnuah UP Chief Minister Yogi Adityanath-a chuan a ngaihven ve chauh a, he pawngsualna thleng chungchang hi Special Investigation Team (SIT) chhui tura a hriattir hnuah CBI kutah hlan a ni leh ta a ni.

Sengar hi police kutah la awmin thu zawhfiah mek a ni. He pawikhawihnaah hian a inhnamhnawih lo niin sawi mah se, a chungah mipuite an lungawi lo hle a, hei hi Y category security pek tihtawp a nih chhan pakhat pawh nia rin a ni. UP BJP MLA hi pawngsualtua puh a nih bakah, Jammu and Kashmir-a

BJP minister pahnih chu Kathua pawngsual thubuaia pawngsualtua puhte thlawpna kawngzawh buatsaiha an tel avangin hengte hian BJP hmel a tibal hle a ni.