CJI ban tura ngenna VP hnenah thehlut

Congress kaihhruaiin eptu party MP 63-te chuan Chief Justice of India Dipak Misra ban tura ngenna motion siamah hming an ziak tawh a, nimin khan Vice President Venkaiah Naidu hmuin CJI ban tura ngenna hi an thehlut.

Eptu MP-te hi Congress MP Ghulam Nabi Azad-an a ho a, Vice President Naidu hmuin CJI chu an thiltih dan a fel tawk lo tiin ban an phut a ni. Vice President an hmuh hnua press conference a neihah Azad chuan, " CJP laka motion siamah hian MP 71-ten an hming an ziak a, mahse an zinga pasarih chu an chawlh tawh avangin tunah chuan 64 a ni tawh a ni. Motion kalpuina tura mamawh zat aia tam member-in hming an ziak tawh a, hei vang hian hemi chungchang hi ngaihtuah ngei a ni kan beisei", a ti.

Congress hruaitu Kapil Sibal chuan Supreme Court judge eng maw zat chuan court kalphung a dik tawk lo tih pawh an lo sawilang tawh tih a sawi. Hei vang hian siamṭhat a nih ngei an beisei a, mahse tun thlengin engmah siam danglam a la ni lo, a ti.

SC judge-te ngeiin judiciary kalphungah hlauhthawn nei a, democracy dinhmun a derthawng nia an ngaih tawh chuan ram hetiang dinhmuna dintir zel hi ram mipuiten an phal dawn em ni tiin a zawt. Democracy chu dah pawimawh hmasak ber a ni zel tur a ni, tiin a sawi.