'Hindu vs Muslim' tia sawitu BJP MLA lakah FIR thehlut

Karnataka-a Bharatiya Janata Party (BJP) MLA Sanjay Patil chu sakhaw inkara inhuatna chawk tho thei zawnga thu a sawi avangin nimin khan a lakah FIR thehluh a ni.

Ningani-a Karnataka-a Belagavi-a thu a sawinaah, Patil chuan an state-a inthlan neih tur chu kawng, tui leh state chhunga mamawh thil dang chungchang ni loin, Hindu leh Muslim, Ram Mandir leh Babri Masjid inbeihna tur zawk a ni tiin a sawi.

MLA thusawi dana lungawi loin police-ah complaint thehluh nghal a ni a, sakhaw inkara inhuatna chawk tho thei zawng leh, model code of conduct palzuta thu a sawi avangin MLA a nihna aṭanga ban nghal turin an phut a ni. FIR hi Belgaum district-a Marihal police station-ah, Indian Penal Code (IPC) section 253a leh259A hnuaiah ziahluh a ni.

Karnataka assembly inthlan hi May 12 hian neih a ni dawn a, assembly member 225 an thlang dawn a ni. Inthlan result hi May 15-ah puan a ni ang.