Loneitute'n Bharat Bandh vawi thumna huaihawt

Loneitute chuan BJP kaihhruai NDA sorkarin Farm Law pathum a siam duh lohna lantirin, nimin khan Bharat Bandh an huaihawt leh. Hei hi farm law pass a nih hnua Bharat bandh an huaihawt ṭum thumna a ni.

Nimin khan sorkarin sawisel hlawh tak, farm law a siam thar pathumte Parliament-a a pass champha kum khatna a ni a, hemi pual hian loneitute he dan pathum duh lohna lantirin zing dar 6 aṭanga tlai dar 4 thlengin state hrang hrangah bandh hi an huaihawt leh a ni.

Punjab, Haryana leh Delhi-ah chuan national highway, state highway, link road leh rel kawngte an dang a, hei vang hi kawngpui leh rel kawnga traffic a buai phah hle. Punjab-ah chuan hmun 350 chuangah loneitute hian nawrh an huaihawt a ni.

Political party eng emaw zat chuan loneitute bandh huaihawt hi an thlawp. Punjab chief minister Charanjuit Singh Channi chuan bandh a thlawp thu hi a sawi a, Bihar Assembly-a eptu pawl hruaitu Tejashwi Yadav pawhin nawrh huaihawtnaah hian a tel ve tur thu pawh a lo sawi tawh bawk. Andhra Pradesh leh Tamil Nadu sorkar pawhin Bharat bandh hi an thlawp tih an sawi. Congress party chuan nimina nawrh huaihawt hi an telpui bawk.

Delhi khawpui daia thla 10 chuang zet farm law duh lohna lantirnaa a hma hruaitu, Bharitiya Kisan Union (BKU) hruiatu Rakesh Tiwait chuan Bharat bandh huaihawt hian loneitute au aw ngaithla tura sorkar a koh harh ngei a beisei thu a sawi. Bandh an buatsaih hi ram chhung hmun hrang hranga loneitute'n an thlawp tih sawiin, region pakhata mite chauh an ni lo tih a sawi bawk.

Farm law duh lohna lantira nawrh huaihawt, loneitute hi Punjab, Haryana leh Uttar Pradesh ami an ni deuh ber a, Delhi khaw daiah hian khawlum, fur leh thlasik khawvawt pawh an lo tuar tawh a ni. Tikait chuan dan thar pathumte sut tura an phutna chu nawr chhunzawm zel an tum tih sawiin, a ṭul chuan thla 10 dang pawh Delhi daiah hian an la inkulh chhunzawm dawn tih a sawi.