CJI-in judiciary-a hmeichhe tana 50% hauhsak a thlawp

Chief Justice of India NV Ramana chuan judiciary-ah hmeichhiate tan hmun 50% hauhsak a thlawp thu a sawi a, hei bakah hian ram chhunga law college-ahte pawh hmeichhiate pualin seat 50% dah a thlawp bawk.

CJI chuan Lady Advocates-in CJI leh Supreme Court judge tharte chawimawina hun an buatsaihah he thu hi a sawi a, "Judiciary-ah hmeichhia hi 50% an awm hi kan mamawh a ni. Hei hi kum sang tel inrahbehna lo awm tawh chungchang a ni. Judiciary level hniam zawkah hmeichhe judge awm chu 30% pawh an tling lo a, High Court-ah 11.5% niin Supreme Court-ah judge zinga hmeichhia awm hi 11.2% chauh an ni pha a ni," a ti.

Ramchhunga advocate maktaduai 1.7 zingah hmeichhia chu 15% chauh an awm a, state bar council-a elected representative zingah 2% chauh an awm bawk tih CJI chuan a sawi. "Bar Council of the India National Committee hian eng vangin nge hmeichhia aiawh an neih ve loh chungchang pawh lo sawichhuak tawh a ni," tiin Chief Justice chuan a rang thei anga thil siamṭhat a ṭul thu a sawi.

Chief Justice thusawi hi September 1-a Supreme Court-a judge tana hmeichhe pathum lakluh zinga mi, Justice BV Nagarathna chuan a thlawp thu a sawi. Justice Nagaratha hi India rama hmeichhiate zinga Chief Justice ni thei tur hmasa ber niin, kum 2027-ah thla khat chhung chu CJI hi a ni thei dawn a ni.

CJI Ramana hian judicial sytem lama hmeichhiate dinhmun chawikan a ṭul thu tun thla chhunga a sawichhuah ṭum hnihna a ni. "Zalenna kan hmuh aṭanga kum 75 hnuah level tinah hmeichhe aiawh 50% tal an awm tawh kan beisei laiin, Supreme Court-ah chaun harsa tak chungin 11% chauh an la awm thei a ni," a ti.

September-a Supreme Court judge atana hmeichhe pathum lakluh tharte nen, ram chhung court sang berah hian hmeichhe judge hi pali an awm mek a ni. Judge awm thei zat 34 aṭanga chhutin hmeichhe awm zat hi an la tlem hle.

Supreme Court hi din a nih aṭangin judge atana hmeichhe lakluh an la tam lo hle. Kum 70 vel chhungin hmeichhia pariat chiah an la awm a, a hmasa ber chu kum 1989-a lakluh M Fathima Beevi kha a ni.