Pawngsualtu thi tura hrem theihna tur pawm

Sorkar laipui chuan kar kalta Inrinni khan hmeichhe naupang kum 12 leh a hnuai lam pawngsualtu thi tur hremna pek theihna tur ordinance a pawm a, nimin khan President Ram Nath Kovind chuan he ordinance hi pawmpuiin a hming a ziah hnan nghal a ni.

Europe ram pathum tlawha ni nga thanga Prime Minister Narendra Modi zinchhuak a rawn haw hnuah, Inrinni khan PM hoin union cabinet meeting neih a ni a, he thutlukna hi an siam ta a ni. Ordinance hmang hian Indian Penal Code (IPC), Evidence Act, Code of Criminal Procedure (CrPC) leh Protection of Children from Sexual Offences (POCSO) Act-te siamṭhat a ni.

Hmeichhe naupang kum 12 hnuailam pawngsualna thleng chungchang ngaihtuah tur hian fast-track court-te din thar a ni ang a, police station leh hospital hrang hrangah pawngsual chungchang bik ngaihtuahna atan special forensic kits-te pek vek an ni dawn bawk a ni.

Ordinance hnuaiah hian hmeichhe naupang kum 12 hnuai lam pawngsualtute chu thi tura hremna pek theih an ni ang. Pawngsual thubuai danga thiam loh chantirte hremna pawh kum sarih aṭangin kum 10-ah tihpun a ni a, damchhung tang tang tura pawhsei theih a ni bawk ang. Kum 16 hnuai lam pawngsualtute hremna chu kum 10 aṭangin kum 20-ah tihpun a ni bawk a, hei pawh hi a damchhung tang tura pawhsei theih a ni bawk ang. Kum 16 hnuailam pawngsual rawntute chu damchhugn tang tura hremna pek theih an ni.

Jammu and Kashmir-a Kathua district-a hmeichhe naupang pawngsual leh a hnua thah zui a ni leh, Uttar Pradesh-a Unnao-a hmeichhe tleirawl pawngsual rawn thleng chuan ram mipuite thin a tirim hle a, pawngsualtute hremna na zawk pekna dan siam phutin ramchhung hmun hrang hrangah nawrh huaihawt a ni fo a ni. Union Minister Maneka Gandhi chuan naupang kum 12 chin hnuai lam pawngsualtute chu thi tura an chungthu rel a nih theih nan Cabinet-ah thlen a tum thu kar kalta khan a lo sawi tawh a ni.

Hetih lai hian Crime Record Bureau-a chhinchhiah danin, ramchhunga pawngsualtua puh mi 10 zelah 3-4 chauh chu thiam loh chantir niin, a bak chu chhuah zalen an ni.

Ram hrang hranga academician 600 chuang chuan Prime Minister Narendra Modi hnenah lehkha thawnin, India rama pawngsualna rapthlak tak pahnih thleng chungchanga a ngawi rei lutuk leh, pawngsual tawktuten rorelna dik an hmu dawn tih a tiam mai lo chu an dem thu an sawi. Kathua leh Unnao-a pawngsualna rapthlak thlenga pawikhawihtute hum tuma thuneitute thiltih dan chu an dem thu te, heng thilah hian PM leh a kaihhruai sorkar chu mawhphurtua an ngaih thute an sawi a ni. PM hnena lehkha thawntu zingah hian New York university, Brown University, Harvard, Columbia leh IIT lar tak taka academician leh scholar-te an tel.